Saturday, March 07, 2009

TVB想同匯控睇齊?

TVB一而再咁喺新聞報導時段內播放阿嬌被訪片段,真係冇眼睇、得啖笑。講真,OK,既然你當得呢單係新聞黎報,咁點解同一單新聞,之前另一個主角阿謝太喺有線受訪又唔見你報導吓?就算唔想幫對手賣廣告,可以唔播片段,齋講嘢都得嘅啫。

事到如今,其實邊個主角企出黎講咩都唔會有太大嘅吸引性架嘞,大家都預左係戲一場。不過冇嘢做、唔介意冇新意嘅,咪睇吓、聽吓、評論吓,當多個話題唔使咁悶咁解啫。

自從TVB將晚間新聞「改革」後,似乎啲風格路線so far都keep得幾「穩定」吓喎,仲好循序漸進咁逐步變身添。首先就由嚴肅嘅新聞報導,變做清談式節目,跟住就慢慢滲啲「今日VIP」feel,最後仲唔黎一個「東張西望」fusion版!

有人話佢變到唔三唔四、越做越cheap,仲cheap過匯控股價咁話喎。哈,如果用得匯豐黎做比較,咁咪即係變相升左級!嗱,話晒匯豐有國際地位,喺香港就更加唔使講啦,啲人一直都當左佢係央行咁睇,HongkongBank HongkongBank咁叫,幾親切呀!爭啲都唔記得佢係間英國銀行黎添。

講番轉頭,可能六嬸同陳生喺隔離台王生事件中被王生感動左,得到啟發,一於要幫王生完夢,誓死唔做第十台。於是為表心跡,坐言起行,決定同大眾一齊呼吸。喂,冇錯吖,報紙、雜誌、網上都唔知幾熱鬧,仲唔係路線正確?唔好話慣性收視至得架,係實至名歸,名正言順可以代表香港嘅香港電視台黎架。吓?有觀眾投訴?哦,幾十個啫,冇乜代表性、冇統計意義嘅。再講吖,人哋新聞部個袁主管最近曾經講過話佢哋點做係唔使向觀眾解釋個喎。

嗱,老老實實喇,如果TVB真係咁用心良苦,準備夜晚十一點播「新聞兩頭望」黎幫一大班辛苦左一日嘅打工一族relax吓嘅,咁我就強烈要求揾崔健邦同李浩林黎做主播,因為佢地睇落順眼啲、聽落順耳啲、風格襯個節目多啲,咁睇左肯定會瞓得好啲啦。

19 comments:

聶秀康 said...

其實30分鐘又似小左D如果係有大新聞的話,但遇著平靜日子半個鐘又剛剛好...兩難呀!

篤篤篤撐 said...

TVB NEWS自甘墮落...

市場維京人 said...

我反而覺得呢種報導手法都可以接受。家下有咗 Internet,要知天下事都唔係咩難事。TVB 家下每報完一段新聞後,主播都會或多或少加上少少個人意見,但都算恰到好處吖。

卡臣 said...

報報吓新聞,扭轉面
「吓,你又點睇呀?」

xiao zhu said...

3耳:

報導新聞事件,要如何挑選、剪輯等,已積累了幾時年的經驗了,我不相信這是一個大問題囉。

xiao zhu said...

篤撐:

係唔係自甘墮落,暫時我都唔去判斷住,不過從市場角度去睇,我會話佢地係自作聰明多啲囉!

xiao zhu said...

維京人:

係唔係我保守呢? 我知道當政府發牌俾一個電子傳媒機構,對不同類型嘅節目安排比重係有要求準則嘅。

要時事評論,我哋可以睇星期X檔案、新聞透視、甚至頭條新聞吖;要輕輕鬆鬆揾啲唔用腦嘅娛樂,又可以八卦人哋嘅私隱,東張西望、今日VIP都好好睇呀。

我淨係知道,除左我之外,有好多人做完一日嘢返屋企,都係想睇吓當日有乜新聞時事發生,純粹想攞資料,而唔係要夾硬逼我睇多半個鐘,去聽果班扮專業嘅人用啲硬蹦蹦嘅語氣去扮輕鬆、幽默講廢話囉!

我絕對支持創意,我嘅工作都需要我不斷創新,不過我覺得無線今次呢啲所謂創新,唔係好恰當。你要評論嘅,就索性改左個節目名佢,唔好再叫新聞報導喇。而最重要嘅係,我會睇到一啲唔好嘅嘢會好快、好容易咁就畀人接受左,慢慢就變成常規;作為一個覆蓋面咁廣泛嘅公眾傳媒機構,佢地嘅影響性係好大架!對於呢啲現象我會睇得好唔舒服,應該話,好睇唔過眼!

xiao zhu said...

卡臣:

>>「吓,你又點睇呀?」

咪係!睇睇睇,真係睇到就把幾火呀!!

樂遊 said...

弟弟裝了有線後,我睇有線新聞多,
幾時睇都得,我覺得在幾個台來說都算不錯
毛記的就少睇了很多
至於.....用gill姐同希希的 '感情'事入新聞其實已經係 '新聞'.其實我真的覺得為何電視台要我們花寶貴的新聞時間去了解某個人的'真情剖白'. 你要宣傳就用廣告時間,用東張西望,要不就搞個特備節目好了.

5號仔股價相信會向更低處進發,有人話下年變10元或個位數......毛記新聞又會否 '睇齊'

新鮮人 said...

我又幾喜歡這種報導風格喎,
無咁死板木獨嘛,
至於新聞內容取捨又係另一個問題,
阿嬌嗰幾集嘅新聞報導我無睇到呀,
唔知係未真係咁有"東張西望"feel囉!

xiao zhu said...

樂遊兄:

我都會間中睇有線新聞台,真係貪佢一日到黑都播住,不過唔知係唔係心理作用,硬係覺得佢地啲質素真係爭啲。暫時都仲係覺得亞視穩定啲。

5號仔會唔會真係跌到落個位數,咁就唔識睇嘞。

xiao zhu said...

新鮮:

要輕鬆啲唔緊要,但係唔係咁囉,我只係覺得好無聊,硬係覺得好似係一個煩女人喺唔適當嘅時候喺你耳邊講埋啲唔等駛嘅嘢,好討厭,好想叫佢"死開啦!"咁囉。

其實播阿嬌講嘢片段仲未係咁東張西望 feel,所以我咪寫話「今日VIP」feel囉。整整吓點知唔變「東張西望」唧!

aulina said...

睇得唔舒服 x2!!! totally inappropriate...

xiao zhu said...

Aulie:

所以我都冇眼睇喇。

seikomatic said...

豬豬,

其實人真系好主觀,例如唔順眼既你典喊都系覺得猩猩作態,中意既就算採花大盜,身懷惡習都會如蟻靼附羶,痛哭恨自已唔系受害人。至於系咪憎埋佢阿媽,定愛屋及其鳥?就睇人罅。

無線晚間新聞聽過人講無睇過,淨系見到有線系度猜包剪石頭。

至於新聞既報導手法從事後到現場,發展到今日做埋狗仔,做臥底,玩偷拍,俺最期待既就系玩 naked news…你話阿守信報左幾耐新聞話?

xiao zhu said...

大師:

邊有真係客觀架,呢啲嘢都係相對嘅。

其實亞視前身,麗的電視嘅時候,新聞報導員都係由啲藝員擔任架喇。後來做吓做吓,要 pro 咯,先至話揾新聞部啲記者做之嘛。(不過唔知係亞視做先定無線做先嘞。)

不敗的魔術師 said...

魔術師歌劇系列之一塊膠布經已公演

新鮮人 said...

人人口味不同,
我個人就幾喜歡這個方式呀!
內容不要太娛樂化就可以了!

xiao zhu said...

新鮮:

係呀,口味呢樣嘢真係冇得解架。

哈,我突然有個問題,你有冇邊啲食物係呢(半)世人都從未食過架?