Friday, March 06, 2009

吹水唔抹嘴

「咦,香港品質保證局同匯豐銀行合辦「企業社會責任指數計劃」喎。」

「吓,匯豐唔係之前至畀人鬧緊冇企業社會責任咩?哈,乜咁快變左身嘅。呀,唔知同嗰啲藝人呢頭宣傳禁毒,嗰頭自己又藏毒、吸毒有咩唔同呢?」

「梗係有唔同啦。獅子銀行而家咪黎話畀大家知,佢知錯喇,仲坐言起行去做嘢,呼籲其他企業唔好學佢吖嘛;而嗰啲藝人就口不對心囉,明知唔啱都繼續做,幾唔同呀!」

(哼,費事拆穿佢啫;搞呢啲咁嘅campaign,佢哋都籌備左一輪至出街架喇,你估啱啱呢個月至戚起條筋咩!)「哦。咦,個評分範圍包括企業管治、社會福利、經濟增長同環境保護喎,唔知啲評分細節係點嘅呢?」

「手頭上啲簡介就冇講呀,可以問吓嘅。」

「唔知失驚無神至話盈利下跌七成,又有(就黎退休嘅)大班爆話唔明點解,咁企業管治會攞幾多分呢?」

「呢啲跨國企業點樣管治,我哋一般小市民講左都唔明啦。」

「咁社會福利呢?喂,裁咁多員,影響幾多家庭呀,製造多啲社會問題就真呀。」

「唔係咁講嘅,人哋咪解釋左囉,經濟好嗰陣佢哋有請多左人架,咁而家咪當打個和囉。」

「咁都得!…好嘞,而家又話盈利大跌,又話供股集資,搞到啲股值跌晒,累埋成個市喎,帶動經濟「負」增長就有份!唔通你又話,唓,咁個價位升到百五嗰陣,你班人都賺左好多啦,咁呀?」

「嘿,係架,你真係講得啱呀!仲有呀,搞到而家咁,講黎講去都係啲美國佬搞出黎架之嘛,我哋獅子銀行都係受害者黎架,陰功!」

「哦,係呀!呀喂,終於都有一樣嘢佢地肯定會攞高分嘞。」

「咩呀?」

「環境保護囉。」

「點解呀?」

「嗱,佢班長期捧場客嘅數量好多架嘛,而家一個二個揸住佢哋啲股票蝕到阿媽都唔認得,仲邊有錢、有心情去消費吖,我肯定垃圾都會少好多呀。仲唔係環保先鋒!」

「嗯,有道理、有道理。」

16 comments:

Desertfox said...

-_-|||||

樸老 said...

我一向都覺得啲人個樣係由心到靚出嚟嘅!

阿靚女緊係手上冇五號仔嘞!

xiao zhu said...

Desertfox:

做咩咁嘅樣呀?

xiao zhu said...

樸老:

吓? 你同我講緊嘢呀? =P

>>緊係手上冇五號仔嘞!

何以見得?

樸老 said...

一係就肉痛到出唔到聲,再唔係有水都攞嚟集腋成裘,一人吐一篤,浸死班 dead orange 融資部博士生管理層,點會浪費嚟吹呢?

市場維京人 said...

Anyway, 匯控話,佢嘅供股計劃好成功呢。

鄭生話,對匯控充滿信心呀。

匯控喺美國嗰面,做緊低過 $40!

冇嘅,冇話咩冇可能嘅。

Cheers!

xiao zhu said...

撲老:

哇哈哈哈哈,dead orange!喂,你揸左好多喺手呀?

xiao zhu said...

維京人:

啲大班同有錢佬係呢個時候出黎講嘅,都係指定台詞黎架喇。

始終呢啲本來都係一種賭博,要知遊戲規則先好坐得落張賭檯度。我哋有幾何會聽過啲人叫賭輸錢嘅人做苦主吖。總之,大家都要做好心理準備喇。

微豆 Haricot said...

>> ... 香港品質保證局同匯豐銀行合辦「企業社會責任指數計劃」: ...評分範圍包括企業管治、社會福利、經濟增長同環境保護

哈哈哈!港人有福了!!獅子銀行在 Corporate Responsibilities 和 Responsibilities to Investors 之間的快擇,是否会有點像「魚与熊掌」?

xiao zhu said...

微豆:

現實裏面,要一個人食晒成條魚,又要晒成隻熊掌,基本上係不切實際嘅。商業上嘅計算,其實都係大自然平衡嘅學問表達嘅一種而已。

aulina said...

小豬你敢唔敢入呀咁?

樸老 said...

赤!

唔係揸左好多喺手啫!

唔使幫我改名囉!

係樸唔係撲呀!

xiao zhu said...

Aulie:

我? 梗係唔入啦!

xiao zhu said...

樸老:

哦,唔使去撲,咁即係都唔太差喇。:P

新鮮人 said...

同邊個有仇就鼓勵佢買5號囉,
包你報仇雪恨呀!

xiao zhu said...

新鮮:

傻佬,咁嘅時勢,你叫就會去買嘅喇咩!