Monday, February 02, 2009

意外、假期

星期日凌晨一時許,又從夢中醒了;(很準時啊!)在床上輾轉了半個鐘頭,還是要起床,喝了半杯暖水,坐了一會兒,準備再睡了,便先去小解。

沖廁後正轉身去洗手,忽然感覺一陣旋轉,腳就站不穩了,整個人劈啪就向後墜下。屁股首先著地,然後頭也順勢剛好碰到浴缸邊,力不太猛吧,人還是清醒,於是雙手慢慢撐起身體,靠坐在牆邊,試着感覺每一個部份,看看有沒有甚麼異樣。除了股骨有點瘀痛,其他部份都好像沒甚麼大礙,就慢慢扶靠着牆邊站起來,洗手,然後回到床上去。

三點多的時候,又醒了,是痛醒了。一陣刺痛從脊骨尾端開始,左邊的股骨特別痛,嘗試坐起來,覺得更加痛,突然頭也有點暈,胃又有點悶,心下一涼,看看時間,想了一下,就拿起電話按999。

心想,總不能光躺在床上等,人家救護人員來到,誰去開門呢?就是爬也要爬出去吧!強忍着,如電影的慢鏡頭般,進行膠卷逐格播放。

推開被子;坐起來;定一下神,想,要帶甚麼衣服嗎?反正要留醫的話,醫院會提供病人服,就隨手拿起一套運動便衣穿上。噢,提起腳穿褲子的時候,竟痛得倒回床上,還是要穿上的呢。這才體會到人家常說,會吃、會走都是莫大的幸福。

穿上了外套,戴上了腕錶,袋好了手提電話,艱巨的旅程才剛開始!要從房間走出去,從來都不發覺這屋子原來是那麼大!左腳每踏前一步,整個股骨到左邊大腿都痛入心脾,幸好這時候再沒有暈眩,腳板貼着地面,就一小步一小步的走出廳去,在小几上拿起袋子,掛在右肩上,再慢慢移步去飯桌邊坐下,從袋子裡取出鑰匙放在桌上,然後等。

門鈴響了,當下很高興,立刻又慢慢地撐起身子,去…開…門。走進了三個救護員,一個負責問我的情況,然後記錄下來,另一個就幫我量血壓、探溫度。(都正常。)後來他們就扶我坐上輪椅,正要把我推出去,我叫了停。

「對不起…」我跟那位幫我量血壓的救護員說,「麻煩你幫我把房間的燈關掉,然後拿桌子上的那串鑰匙,等會兒替我把門鎖上好嗎?」

那位救護員的臉上似乎掠過一絲詫異,就進去把房間的燈關掉。


「欸,也麻煩你把那個袋子給我吧,謝謝。」我同時向另一位救護員說。

我把袋子放在大腿上抱著,他們就把我推了到門外等着,那位救護員關門前也順手把廳的燈也關上,然後把門鎖好,就把鑰匙還我。

「謝謝!」

「你也倒清醒喔。」那負責紀錄的說。

「嗯,証明我的頭應該沒有撞壞了。」我笑着應了一句。

救護車上,他們很小心地讓我躺下,固定我的位置,蓋好氈子,一路的態度都很可親、語氣很體貼,很能令病人的心安定。

幸好急症室裡面不算太多病人,大概等了四十五分鐘就有醫生看我了。答了一大堆問題,搞了一大堆的甚麼檢查,最後就被送到病房去,已經接近七點鐘了。星期天就是等,等星期一到,等醫生再來。

躺了一整天、一整夜,是止痛藥起效吧,痛症像是漸漸消退了不少。也終於知道痛的原因了,原來左邊的股骨有一度不到四公分長的裂痕,不深;醫生說不用擔心,只需要多休息,避免太大的動作就是了,讓它自然癒合。

就這樣,下午就可以出院了。本想待食過晚飯才走呢。

所以,病假中。


* * * * * * * * *


在我跌倒的那一刻,腦海裡面同時閃出兩個畫面交疊着。一個是電影「死神來了」第一集裡面,那個在浴室跣倒,最後被晾衣繩勒斃的少年。(哈,這套電影我看了四次,都是在電視看的。)另一個畫面是我看見自己拿起電話,按了掣,接通了,響了三下,然後自己掛上了。

兩個畫面閃過後,我笑了一下。

70 comments:

michelle said...

嘩,祝快康復 !

Anonymous said...

「死神來了」也是我和父親最愛的電影之一,當年跟他一起看dvd呢。

多多保重,祝早日痊癒。建議裝救命鐘。

「魔術師歌劇系列之故、事」經已公演,但這次是三級的。

Anonymous said...

安心休養。要小心留意自己的變化。祝早日康復。

. said...

祝你早日康复。

C.M. said...

小珠!搞乜鬼呀你!

多D休息,再搵你。

Blogger70th Floor said...

小珠你
唉!
你要乖乖養傷
不要亂動呀

卡臣 said...

祝你早日康复

樂遊 said...

唉...不用開刀,都算是不幸中的大幸
小心休養了,祝早日康復!

我想起以前有個同學.....在睡夢中肩膀脫骹,痛醒,入院....

Anonymous said...

浴室地滑,日後要小心點啊,祝你骨傷早日痊癒!行走時需要借助拐杖嗎?
當時腦中閃現的那個畫面,是否潛意識第一時間想致電他求救?

ah-yun said...

Take care!

Anonymous said...

嘩,保重呀!

我今日都無啦啦放假,因為倫敦落大雪……

火鶴 said...

小小珠,
快D好返啦.

Carrie said...

嚇死人。快D好番!

L L said...

小豬:

事事小心,祝早日康復!

Anonymous said...

小心身體呢
祝早日康復
唔好周圍走啦
你的起居飲食有人幫到你嗎

Anonymous said...

:O

Anonymous said...

July 22, 2008 有心無聊提過:
《我假假地都係 XXXXXXX 喎!
《都有啲報導價值架。

襟得幾密噃,都唔見報導嘅?

祝小朱姐早日康復!

said...

祝安好
第時帶米b女泥探小豬姨姨呀吓~

Hana said...

想打嘅電話哩個時候做咩總唔打?(俾着我想打嘅一早打咗唔會等)

話時話股骨傷咗,你唔好坐係度用電腦吖!

快啲快啲好返啦!

xiao zhu said...

Michelle:

嘩,沒想到你會到訪!謝謝!

xiao zhu said...

魔術師:

第一次看「死神來了」是在上海,在酒店房間看的。嘩,一開始就飛機爆炸,第二天早晨我正要坐飛機回家呢。不過我百無禁忌,看得頗過癮。

哈哈,我當時都有想起救命鐘這東西。究竟是隨身的,還是要固定安裝的? 人人都可以裝的嗎?

記憶中,你好像從未寫過如此三級的啊!

xiao zhu said...

洛言:

安心,不知何解,我總覺得這個詞很有趣,有種陌生感。

謝謝你,我對自己身體的感覺和對自己心的感覺都一樣敏感的。

xiao zhu said...

量子:

很久沒見了。謝謝你的慰問!

xiao zhu said...

C.M.:

冤枉呀,我冇搞到鬼呀!就算搞,我都係搞人之嘛。=P

xiao zhu said...

七十:

放心啦,我會動,但不會亂動的。

xiao zhu said...

卡臣:

最近個腦裡面有啲故仔,或者可以趁呢段時間寫寫。(如果我啲三分鐘熱度未退嘅話。)

xiao zhu said...

樂遊兄:

係呀,算好彩架喇,冇撞親個頭。

我都有個朋友試過肩膀脫骹,仲要係慣性添,試過有一次揸緊車脫骹呀,幾危險呀!

xiao zhu said...

Shek:

其實那晚跌倒並非因為地面濕滑所致,不過我都會小心的了。

在家中也不需要用拐杖,慢動作般行倒還可以。另外家中有一有輪的辦公椅子,可以用來游走於屋內,都減少了不必要的耗損運動。

在那電光石火間,其實意識和潛意識都已經交錯了無數的念頭、意欲、分析和判斷,徒歎情何以堪。

xiao zhu said...

Yun:

這麼「忙」都來看我,謝謝!^_*

xiao zhu said...

思哲:

嘩,久違了。

十八年來最大風雪,很惡劣嗎?

xiao zhu said...

火鶴:

承你貴言。

xiao zhu said...

Carrie:

唔駛驚,冇事冇事!(真係嚇人嘅我都冇講架喇。)

xiao zhu said...

Long:

嗯,我會小心架嘞。多謝!

xiao zhu said...

思..寧:

周圍走? 仲點走吖!

我阿嫂已經幫我上左倉,我自己都搞得掂嘅。放心!^^

xiao zhu said...

小寶:

突然間諗起有人話過如果有一日行行吓街俾車撞倒,咁...

xiao zhu said...

Space:

我成日都覺得你真係好啱做資料搜集嘅唧。

多謝你呀!^_^

xiao zhu said...

米搞:

講出黎驚你話我變態,我真係一日去睇幾次架。

xiao zhu said...

Hana:

以你嘅性格,我知你一定會。而我呢,我都會,但係我唔一定會。

我係一個敢愛敢恨嘅人,但係敢愛敢恨對我黎講,並唔代表淨係敢於去表達。(要表達一啲都唔難。)面對唔同嘅對象,處喺唔同嘅時空,即使都係呢個我,都會有唔同嘅處理方法。

我越來越自豪於自己有過嘅經歷,無論喺邊一個時刻要我離開呢個世界,我都冇乜覺得遺憾。無憾唔等於完美、無瑕,而係在於價值嘅定位同比較。

我清晰知道自己要乜嘢,亦清晰知道自己做緊乜嘢,最重要嘅係我清晰知道自己點解要咁樣做嘢,所以我唔需要好似坊間果啲書咁教(提醒)人死前必做幾多幾多件事,我相信到我離開嘅時候,我都唔駛講「早知」呢兩個字。

哈哈,你睇,無程程又噏左咁多無謂嘢。喂,唔坐喺度用電腦,咁唔通要瞓喺度? 嗱,我而家咁無聊,唔好叫我唔用電腦呀吓!快啲俾啲有建設性嘅提議黎,你咁多鬼主意!

C.M. said...

小珠,不如咁丫。比幾條IQ題你玩下丫...

... 你依家響邊庶呀?有冇返工呀?有冇唔休息呀?

(好似有d人睇漏一眼都會乘乘機機咋咋帝帝)

xiao zhu said...

C.M.:

嘿,我都話冇撞親個頭咯,駛乜玩IQ題喎!

英倫肥龍 said...

你保重呀~
點解會成責醒既?

祝你早日康復.

C.M. said...

對不起

Hana said...

>我越來越自豪於自己有過嘅經歷,無論喺邊一個時刻要我離開呢個世界,我都冇乜覺得遺憾。無憾唔等於完美、無瑕,而係在於價值嘅定位同比較。x2

如果坐係度用電腦唔影響康復速度嘅,咁總使乜出鬼吖?啦啦聲寫埋啲故仔出來了喂。

JC said...

小心身子。
祝早日康復。

Hyacinthus said...

新年流流做乜事攪成咁呀???
跌傷左豬仔脾就無得玩笨豬跳架,
快d快d快d要快d快d快d好番 =)

xiao zhu said...

肥龍:

嗚嗚,你都記得咧!舊年又係咁嘅時候,好似較左鬧鐘咁,又黎喇。-________-

xiao zhu said...

C.M.:

係唔係想搞喊我至收科呀?

xiao zhu said...

Hana:

哈哈,三分鐘真係好快過架!

xiao zhu said...

JC:

謝謝你!我一定會小心。

xiao zhu said...

風子:

都冇乜所謂新唔新年喇,對我黎講,過年如過日。

笨豬跳,我唔笨,不過我傻啫。哈哈!

Anonymous said...

嗬嗬嗬!既然吉人天相!
魔術師都三級
咁就三級啲問一吓,
醫生有冇話要幾長時間休息,
唔可以做愛love making呀?
好返以後,可能都唔可以放到盡,
會有顧忌噃!
還有還有,懷孕有冇問題呀?
要等幾年,等的骨生返強壯,至可以生囝吖!
以上問題純在醫學康復出發提問咋。

Anonymous said...

死囉!呢趟玩大咗!

xiao zhu said...

Space:

哈哈哈哈,俾你笑死我喇!

嘿,本來睇緊第二啲博,諗住遲啲至覆,點知見你咁驚青,唔想你今晚瞓唔著,就覆左你先。

我嘅情況喺醫學上應該係碎料黎嘅。嗱,每個人嘅體質都唔同,同一個病症喺唔同人身上都會有唔同反應同結果。一般黎講,咁嘅骨裂程度,三幾個禮拜點都可以癒合架喇,當然係唔好亂咁郁,避免患處嘅部位不必要用力或者受力喇。

至於做愛嘅問題,如果撇開意欲同對象呢啲大前提嘅話,大佬,負緊傷、郁少少都仲痛嘅話,正常情況都唔會做架喇下話。到唔痛果陣,想做嘅,咪就住吓囉,冇問題架。

講到懷孕嚕喎,既然都唔係咩咁大件事,就梗係冇問題啦,唔駛等幾年咁耐喎。但係真係要懷孕嘅條件就要更加多嘞。

喂,呢啲都係小兒科(頂多加埋婦產科嘞)嘅嘢,唔三級吖。

早抖喇!

Unknown said...

初時看以為是過度疲勞而昏倒,好在沒撞到頭部,小珠好好在家休養,好讓傷處快點癒合喔!

祝早日康復,牛年壯健如牛!

Anonymous said...

...........
...........
...........
...........
...............
撞車?上次咪撞過囉 ;)
好多野想講
不過我一開聲就咳
而且忙到頭暈
又.........
得閒再講你知
不過可能到時候又唔記得晒囉
:p

seikomatic said...

豬豬,

好奇怪架,平日無泥事實,真系唔知行一步路,舉一下手系要咁多條肌肉配合,至戒損左手,等親條腰骨,先明白到得來不易,未必擁有,希望小病是福,寫多幾篇等咱們知道你仲.............remain

雪山飛狐 said...

wa, very sorry to hear that, glad that it is nothing serious.

Take good care of yourself la, get some good rest.

macy said...

xiao zhu

不幸中之大幸吖. 保重.

你真很有冷靜及處理危機的能力. 佩服!

早日康復! ;)

Anonymous said...

噢!小朱姐冇事就好了!
見你啲回覆由February 03, 2009 3:41 PM開始,到February 03, 2009 11:01 PM
即是由下午一路對著個電腦到夜晚,
驚你太辛苦因坐得太久睡著了,
咪寫啲嘢test一吓有冇反應囉,
不過我等唔到睇唔到February 04, 2009 12:25 AM的回覆嚕,我真喺早抖咗!

謹祝:早日康復!

Anonymous said...

60th

哈哈哈!第六十則回應!

我漏咗問幾時返去復診呀?

xiao zhu said...

小軍:

我應該沒甚麼大礙的,謝謝你。你自己也要保重身體啊。

xiao zhu said...

小寶:

算喇,我都預左你唔記得架嘞。

xiao zhu said...

大師:

是禍是福,倒不是因為大病小病,到頭來還看自己。

其實我是否還在,不重要;又大家是否知道我是否還在,都一樣不重要。但我並不羨慕我本無我的境界,我只繼續樂於享受做微塵的有邊際的生涯。

xiao zhu said...

Desertfox,

Yup, you too.^_^

xiao zhu said...

Macy:

噓,靜靜的告訴你,其實我還叫了那救護員做了另外一件事,就是幫我到廚房去,把煤氣總掣關掉。

xiao zhu said...

Space:

咦,點解我好似見到有隻疑似禽流感雞喺度掙紮緊咁嘅!哈哈哈哈哈哈...

一個月去復診。

新鮮人 said...

噢~~~
我遲來了,
今天才知道你有傷了,
現在好一點嗎?
多多保重呀,
在家休息不要上班嗎?
快啲好返呀!!! =(

xiao zhu said...

新鮮:

嘿,遲黎好過冇黎。

哈哈,講笑咋,冇黎都冇所謂架,又唔係咩大件事。(好悶呀!)

Anonymous said...

69th 喇!
我冇學東涌啲散養戶,擺啲病雞落飯煲煮熟!
講事實啫,唔好誤會!
咁咪放足一個月病假?又可能追加多個月添?

xiao zhu said...

Space:

病假梗有俾喇,不過我諗我都唔會放足囉。