小時候，想…結果…

— 做明星（那時還不懂甚麼叫做演員）；
* 如果我話有人揾過我做，我唔做，信唔信呀？哈哈，講吓笑啫。業餘做過吓舞台劇咁喇。

— 做播音員（只想做廣播劇那種）；
* 廣播劇就冇機會聲演過喇，但係都試過吓做電影配音嘅。

— 做歌唱家（不是歌星啊）；
* 自小都經常在「家唱歌」架，由右邊讀起算唔算呀？

— 做俠盜（武功當然都要好）；
* 生性懶惰，學武不精，所以做唔成俠盜，唯有間中去做吓架輛女俠囉。

— 做建築師；
* 樓就冇資格起過喇，唯有喺劇場裡面象徵式實現夢想，試過做舞台設計，仲落手落腳做過吓佈景添架。

— 做畫家（抽象派）；
* 做嘢之後都冇畫過畫，只可以偶然懷緬吓讀書時都畫過一兩幅畫得過聯合國唔知咩圖畫比賽嘅優異獎架；不過唔係抽象畫，係風景油畫。

— 做律師；
* 不學無術，乜師都做唔成喇。不過同我做過嘢嘅律師同大狀都話我應該做喎。講真，細個時候好想做律師係因為以為做律師可以伸張正義；越睇得多、知得多、經歷得多，發覺都係得閒做吓架輛算嘞。

— 到十八歲換成人身份証的時候順道改名；
* 越大就越鍾意自己個名，梗係冇改啦。

— 學劍道（因為好型）；
* 細個時候就冇錢學，大個左，感覺又唔同左喇。（雖然都仍然覺得好型。）

— 住在香港島（覺得那邊的天空比較高、比較清、比較光）；
* 到自己有能力負擔同話事嘅時候，又因為返工嘅地方一直都係九龍，最重要嘅係父母住九龍，唔想離開佢地太遠（距離感係要代入佢地嘅標準去定），所以始終都冇住過香港島。而家，冇所謂嚕。

— 有一條粉藍色的紗裙；
* 二姨媽喺我六年級果年話送條裙俾我，於是我就願望成真嘞。

— 對腳快點大，大到可以穿媽媽的高跟鞋；
* 到對腳大到可以著媽媽嘅高跟鞋嘅時候，佢都唔再著嚕。

— 留長頭髮，要像雯表妹一樣可以束辮子；
* 等到中學至俾我將啲頭髮留長過膊頭，（邊個咁惡？梗係阿媽啦！）不過果時又唔係咁鍾意梳辮嚕，鍾意梳馬尾，但係中三之後又剪番短。

— 學彈結他，跟權表哥夾 band（因為型）；
* 唔准學呀，話飛仔先至彈結他固喎！大個左發覺彈得多手指頭會起繭，都唔再恨喇。最後走去彈古箏。

— 學打鼓（發覺比彈結他更型）；
* 雖然真係好型，但係配合練習嘅條件都幾多，（係，懶人係特別多藉口嘅。）都係彈古箏簡單啲。

— 變得有真正實力能夠打贏哥哥（平手都可以）；
* 都唔知可以點至變得到，唯有諗其他變通方法補償。就係每當我哋喺爸爸媽媽張床擂台比武嘅時候，我就要做黃飛鴻，哥哥做奸人堅囉；又或者做文戲嘅時候，我就做小霸王，佢做小歌女，俾我欺負、調戲囉。哈哈，諗起都好笑！

— 可以用浴缸沐浴（明明有浴缸，但媽還是要我們用浴盆）；
* 喺小學五年級、臨要搬去住公屋之前，媽媽就俾我哋試過兩次用浴缸沖涼。嘩，我仲記得我沖（玩）左好耐，啲水凍晒都唔捨得起身呀。

— 像其他女同學一樣，夏天可以穿背心底衫，不讓底衫領露出校服裙領口（多羞家！）；
* 有一日，阿媽發覺我校服裙裡面竟然冇著底衫喎，（嗱，果時喺讀緊小學四年級！）嘩，鬧到飛起喇梗係，仲要即刻著番先准返學。我當然一百萬個唔願意喇，不過都要屈服喺佢嘅強權底下。哈，點知果日放學返到屋企，阿媽竟然攞左件背心底衫俾我喎。

— 在下雨的時候，可以用雨傘，不穿雨衣和水靴（很土呢）；
* 小學六年級果年，大姨丈去日本旅行，買左把藍色底、有好多船嘅圖案嘅縮骨遮俾我呀，幾開心呀，覺得自己係大人喇！

— 像其他同學一樣，可以自己去買早餐回學校吃（可以天天吃不同的早餐）；
* 到中學先至好間中、好間中俾我自己喺出面買早餐咋。不過，喺屋企食早餐嘅習慣，延續到今日。

……