Sunday, May 13, 2007

的士奇遇(三)--- 驚魂夜(下)



上集講到,有一晚我開開心心喺銅鑼灣唱完K,搭的士返屋企,但係發覺個司機好似有啲問題。一路上我都提高警惕,點知就臨到差唔多到屋企附近,佢竟然「行錯路」喎!

。。。。。。

「啊,幾好 ......」正當我說著之際,猛然發覺車子並沒有依循正常的路線靠左,而已經駛上了天橋,向著獅子山隧道駛去!我即刻大聲問那個司機:

「喂,你點解行呢度呀?你頭先應該靠左轉左架嘛!」我同時跟G說:「個司機行錯路呀,我一陣再打番畀你。」

「吓?哦 ... 哦,呀,係噃係噃,唔好意思呀,我一時冇睇清楚呀。唔緊要喇,你唔駛驚,我一陣間調頭喇。」

「你而家都上左橋,咁點調頭呀?一路要入獅隧喇!」心裡又怕,但總得要鎮定。

「哦,過左隧道我咪搵路同你調頭囉,好快嘅啫。我唔收你錢喇!」我發覺他的語氣又似乎是頗正常的,不像是精神有問題的。跟著他竟然若無其事地繼續高聲唱歌,是我敏感嗎?總覺得他唱起來帶一點自鳴得意的感覺。這個時候,我的想像力、聯想力又再發揮威力了,幾千百個念頭在電光火石之間一起洶湧出來。

其實過了獅隧的另一邊,路線應該怎樣走我是一點頭緒都沒有的,我一點都不熟悉那個地區環境,尤其是已經時值深夜了,將會在哪裡可以調頭呢?我怎麼知道他再走的路是正確的呢?他會否繼續駛到一些荒郊野外或者甚麼地盤之類的地方?

如果他是精神有問題的人,那就是最棘手的了,因為一切都將不能以常理去推斷的了。最緊要還是保持鎮定,特別是這類人,應該盡量避免激動起他們的情緒,見機行事吧。必要時想辦法跳車吧;一路上也注意到他的車速並不算特別快,只是駕得不很定,弄得我也有一點點頭暈。

如果他不是精神有問題,而是一個普通的劫匪,那麼,我錢包裡面的三數百元對他來說會否嫌太少呢?如果會的話,他在老羞成怒的情況下會怎樣呢?嗯,會要我說出櫃員卡和信用卡的密碼,讓他去銀行櫃員機提款?他會禁錮我嗎?還是挾持我一起去提款呢?以前也曾經遇劫,利刀架頸的情況下還成功跟劫匪取回所有証件和信用卡等,這一次會否能夠一樣幸運的呢?

他還會窮心未盡,色心又起嗎?要是真的話,那我可以怎樣?體力方面是無法反抗的。要順從配合,盡量減低受傷害的程度。但是,如果他事後要殺人滅口,那怎麼辦?又或者,如果他是精神有問題的,會不會有一些進一步的變態虐待的行為呢?唉,那就死定了!

當腦筋仍然不斷地在運轉的時候,他突然整個身體很大動作地轉向我,左手更伸直橫放在前座的椅背上,說:「小姐,你唔駛驚,我唔會收多你錢嘅,你一陣間淨喺畀番上橋之前個數就得架喇。」說完還冷笑一聲。嘩!!

我並沒有回答他,只繼續留意著他的語氣和動靜。我在想,向甚麼人求救呢?可惜我差不多所有的好朋友都是住在港島區的,遠水救不了近火呢。住在九龍而又最近的一個是TY,但是他又剛出差不在港。我突然想起政府醫院是有警察駐守的,如果能到醫院去就安全了。我實在不想冒險讓那個司機在一個我不熟悉的地方找路調頭回去,誰知他又會不會騙我的。因為曾經有一段時間常到沙田威爾斯醫院探病,所以附近唯一稍有印象的路線就是去威院了。用甚麼理由叫他去威院呢?如果他是有企圖的,我不能就這樣叫他改變目的地的,反而讓他更有防備了。嗯。。。

我使勁的運動著腹部的肌肉,刺激胃腔,很快就開始打嗝,還故意誇張了打嗝的聲音,正因為之前也喝過酒來,所以也有點點的酒味湧上口腔;然後還稍為作不舒服狀,輕聲呻吟兩下,然後跟他說:

「你架車太 “chalk” 喇,我好暈呀!我個胃好唔舒服呀,好想嘔呀!你有冇膠袋呀?」

這個時候車子還在隧道裡面呢。看,那麼短的時間我腦海裡面已經翻騰了幾千轉了。我也想再試試他的虛實,一開始的戲不能太誇張,否則很難入信的。

「吓,膠袋呀?……冇喎。你 … 你點呀?你係唔係真係嘔呀?你忍唔忍到呀?」

聽他這般的反應,可能情況並非我想像那麼差。但事到如今,實在不想冒險了,捕風捉影也好,寧願去到醫院再轉乘另外一輛車,比較心安一點。

終於出了隧道了,我開始加劇反應。「唔得喇,我個胃好痛呀,好辛苦呀,你 … “Urg” (作嘔吐的聲音)你不如車我去威爾斯啦 … “Urg”,哎呀我驚我忍唔住呀 … 我驚我要 “Urg”,會嘔落你架車度呀!」

「不如我停喺路邊畀你嘔左先喇!」

「唔得呀,唔得呀,我個胃痛得好緊要呀,你快啲車我去威爾斯啦!快啲啦!我 … 我盡量忍啦,你唔快啲我就真係忍唔住架喇。」我邊說邊用紙巾蓋著嘴巴,又再呻吟幾下。他果然加快了車速,所走的方向是我認得的。於是我繼續交戲,不敢怠慢,還不時催促他,他也唯唯諾諾的應了一兩聲,似乎真的想快點到醫院。

我為了演戲演全套,而且也真的需要個保險,於是就打電話給G:

「喂,我突然胃抽筋呀,我而家坐緊頭先架的士去威爾斯呀,你幫我 call 阿John,如果佢今晚喺度當值,叫佢三分鐘後喺急症室門口等我吖。喂,如果佢唔喺果度,都叫佢揾個同事出黎接我吖。(看看左邊車門上有車牌號碼,)架的士個車牌喺KG 6983呀。」(註:這並非真實的號碼,因為已經遺忘了。)

「收到,我寫低左架喇。嗱,你定啲黎,我唔會收線,你有嘢就大聲講喇。有事我會即刻報警架嘞。」果然是老朋友,又醒目。

夜靜,路面車輛少;不久,威院已經在望了,心也開始定了。

車子終於停在急症室門口,我匆匆的付過了車資,開門下車就走進醫院去了。邊走邊提起手裡的電話跟G報平安,把事情告訴她。她也為我抒了一口氣呢。讓自己的情緒定了一下,想想也笑了出來;慢慢的再走出門口的的士站,上了第一輛車。

「唔該九龍XX道吖。」

「好呀。」

扣上了安全帶之後,再打個電話給G:

「喂,阿爸,我而家喺威爾斯搭的士返喇。車牌係 ……


x x x x x x x x x x


後記:我突然間諗,你哋睇完之後,會唔會覺得精神有問題果個係我呢?噢!
後後記:寫寫吓都係覺得長左啲,唔鍾意呀。不過又唔想再吊你哋癮,所以都係簡略左少少寫埋佢。

56 comments:

Ruth Tam said...

Interesting to read but scary to experience.

暗黑的卡夫卡 said...

「小姐,你唔駛驚,我唔會收多你錢嘅,你一陣間淨喺畀番上橋之前個數就得架喇。」說完還冷笑一聲。嘩!

Are you schizophrenic? Or did you have some bad memories from taxi drivers when you grew up? We don't know :P

All we know is...you got excellent story telling skills, thats for sure!

I don't know what I will do for me in Toronto 'cause ... "No cell phone reception"!

=_='

Todd said...

嚇死我咩,講到又劫財,又劫色!
不過,你幾好急才喎,小豬!
仲可以即刻打到嗝,厲害!

但,下次都係一上車,打定電話,話定車牌,穩陣D呢!小心呀!

o丫,上一次遇劫單野,幾時講呀?
驚唔驚呢??我心血少噃!

Blogger70th Floor said...

好叻呀你
你一定係做同戲劇有關係既野既(好橋又好戲)!


我支持並呼籲女生們學習你既做法

又又
如果我係你
我都會諗計脫身先

Haricot 微豆 said...

您真「醒目」, better safe and late, than sorry。 在我這边,有很多單身女人,入夜之後,就用电話叫的士,起碼有的士公司的dispatcher知道來龍去脈,減低危險成数。

Anonymous said...

好得人驚呀小朱姐!!!

好彩我屋企付近乜車都到我又唔去夜街啫...

vicky said...

扮嘔都得, 咁好演技, 服左你.

新鮮人 said...

你有演員同編劇的急才喎,
會唔會考慮入演藝行呢? :p

xiao zhu said...

Ruth,

都真係驚架,頂硬上咋。

lu said...

xiao zhu,你好勁呀,但真係畀你嚇死囉.

如果真係畀我撞到都唔知點算,實會變左做鵪鶉.哎呀...我好無用呀. >_<~

另,繼續努力,加油奮鬥哦!

xiao zhu said...

K,

Yeah, I'm a schizophrene. Otherwise how can I see what you see, feel what you feel ne?

"you got excellent story telling skills"

Schizophrenes are always over-sensitive. Beware of your wordings ah. Are you talking the reverse side, huh?

Tell you the truth la. No, I don't have any bad experiences from taxi drivers in the past. So this is the last post on taxi drivers at the moment.

xiao zhu said...

Todd:

去到呢啲處境就一定會咁諗架喇。人到左一啲危急關頭,好多時都會有很多意想不到嘅能力表現出來嘅。保命喎,大佬,唔講得笑架。你咪睇我好似講得好輕鬆咁呀,當時真係好緊張架。

上次遇劫? 又寫呀? 話時話,你哋真係有冇懷疑我係唔係喺度老作架咁呀? 邊得黎咁多奇遇呀!有冇咁諗唧?

我都覺得自己啲經歷都真係幾多幾奇怪。上次遇劫又真係非常驚險,真係有把刀"杭"住我條頸架。不過我都保持到鎮定,梗係要定喇,如果唔係唔覺意"hai" 到都死人架嘛。我咪同個賊講,我會合作畀錢,問佢可唔可以唔攞我啲身分証呀、卡呀咁囉。唔駛我要申請過哂咁慘嘛。吓,佢又真係制喎!收尾我仲見到佢哋架賊車,記低左號碼去報警添呀。仲有啲細節唔講喇。得閒想知就貓我喇。

xiao zhu said...

七十妹:

其實係生活裡面好多時都係要隨機應變架喇,遇到危急,盡量唔好畀自己咁"tun"雞,一亂就咩都諗唔到架嘞。

今次嘅做法下次未必啱用嘅,都係要執生喇。

我而家做嘅嘢同戲劇係冇關嘅。唔係一定係做呢行先至識嘅。(雖然我唔係真係叻!)就好似參加香港小姐咁,有幾多個真係靚架?好多真係靚過啲又唔會去參加喎。

xiao zhu said...

微豆:

都唔係醒唔醒目,係發揮求生本能啫。

香港地,平日周街都係的士,都唔駛 call 的士台喇。通常係喺啲較為偏僻少車到嘅地方,或者當打風落雨嘅時候就會囉。

xiao zhu said...

3:

講番起都真係覺得好得人驚架!大吉利是,有起事上黎,真係唔知會點架。

xiao zhu said...

Vicky:

哈哈,得閒練吓喇,都無妨架。Touch wood! 當然唔希望要喺咁嘅情況下用喇。

xiao zhu said...

Fresh:

要入晨早都入左喇。係唔係好寸呢? 不過真係架喎。

xiao zhu said...

Lu:

唔駛驚,唔駛驚!冇事,冇事!

唔會架,人人都有用嘅。到有需要嘅時候,可能你有好多潛藏嘅威力發揮出黎,仲勁呀!

多謝你繼續同我打氣呀,我真係好需要架!仲有派打呀,越打越激烈添。唉!

Anonymous said...

你真很冷靜機智,嚇得我一頭冷汗。

xiao zhu said...

Lilac:

希望我的冷靜機智不用再這樣發揮就好了!

Todd said...

我真係一D都冇懷疑你喺度老作喎,你又冇錢分,做乜要呃我地喎。而且,你個人講野咁"掘",都唔似口花花,大隻講D人。

好彩次次都有驚無險咋,係咪你個野成日去夜街,所以咁多嚇人經歷呀?下次出街還出街,搵定個"換燈膽"果D送你嘛,一個女仔夜媽媽,冇事嚇餐飽都唔抵呢!

(打劫單野未夠喉喎,等我清閒D,貓你問清楚呀!)

C.M. said...

雖然你精神無問題,仲夠冷靜,不過你當時嚇死你朋友遮。

xiao zhu said...

Todd:

蝦,你係讚我定踩我呢? 不過係架,我認我係倔雷鎚架。哈哈!

都話明淨係做換燈膽咯!你放心啦,我而家好深閨架喇。^_*

xiao zhu said...

CM:

係呀,你冇講錯呀!=P

梁巔巔 said...

典解冇人讚我勁?! :(

喂, 我仲激過佢喎!

xiao zhu said...

梁公子:

久違喎!咁好今日大駕光臨,實令蓬蓽生輝,榮幸之至呀!

唉,梁公子巔巔有幾勁,就已經係blog界公認架喇,粉絲無數。以你嘅層次,邊仲駛講咁多吖? 一班blog友都係對我體貼鼓勵吓啫,你唔好咁耐唔黎,一黎就玩我呢個後輩至得架,我好脆弱架咋!而且,我仲要你照住架!至多"砧"番杯茶過你飲嘞。

xiao zhu said...

梁公子:

"喂, 我仲激過佢喎!"

頭先漏左添。係呀,如果論"語言" 運用,幾時都係你激啲喇!仲駛講嘅。

巔巔公子勁,
巔巔公子醒,
巔巔公子冇得頂!
YEAH!!!

梁巔巔 said...

嘩!!!! 頂~

逃!

macy said...

嘩! 你激到 梁巔巔

"嘩!!!! 頂~

逃! "

好攪笑 :)

點解你會咁多的士奇遇架. 係米你一日搭好多次的士,所以命中率咁高?!

真係好險咯, 有無方法可以避免,有無其他交通工具可以搭? 我都覺得而家好多的士司機都short short地.

"以前也曾經遇劫,利刀架頸的情況下還成功跟劫匪取回所有証件和信用卡等"
好勁!唔怪得你今次咁冷靜咯!

Anonymous said...

看完上下兩集﹐佩服小朱姐的處險不驚的鎮定﹐並解答了為何小朱姐搭很多的士﹐從行車路線參考﹐小朱姐家居一帶公共運輸服務較疏﹐有的話可能下車後還要步行一段路哩。

如果不多坐的士﹐自己架駛都可以是樂趣的!

xiao zhu said...

Macy:

我冇激佢呀,邊有唧! :P

係呀,我都搭幾多的士架。Space 喺樓上講中左喇。我屋企係冇公共交通工具直接到架,要轉專線小巴,但係又唔密,而且如果夜返就冇得搭。不過我平日都會搭嘅,因為我個人心急,我覺得如果錢可以買到時間嘅話,而我又負擔到,我係會買嘅。我唔鍾意 shopping,唔會買名牌衫、名牌手袋、化妝品等等,相對於呢啲,搭的士嘅費用都唔係高消費。

xiao zhu said...

Space:

你果然心水清呀吓!

我有駕駛執照,但係我唔適宜揸車架。因為我個人好多嘢諗,揸車好危險架,我唔想累街坊呀。

Anonymous said...

住得個頭﹐唔使名牌衫、名牌手袋、化妝品等等,睇的人都當是名牌設計喇!

xiao zhu said...

匿名者:

我諗我明你講咩,不過我又真係冇見過喎。可能我行路唔帶眼喇。

Gavin said...

以前也曾經遇劫,利刀架頸的情況下還成功跟劫匪取回所有証件和信用卡等,這一次會否能夠一樣幸運的呢?

---> 點發生架!? 我想知!

他還會窮心未盡,色心又起嗎?要是真的話,那我可以怎樣?體力方面是無法反抗的。要順從配合,盡量減低受傷害的程度。

---> (o.o!) 好一句盡量配合......妳好堅強, 理性同勇敢! 我真心的。

小豬呀小豬,我呢, 又唔覺得妳過敏喎, 我覺得女仔一個人根本係可以好危險,雖然呢度係香港。我有朋友做銀行, 讀緊cfp佢take完一班有關壽險既番黎講,話一年香港都唔知失蹤幾多人, 當中女仔大多數。

我都試過去完老蘭,3點幾由中環坐番大埔(太wing太累), 佢過埋獅隧入大埔行錯路, 要兜大彎! 好明果種慘法. 講開又講. 覺唔覺依家好多taxi 司機對道路好唔熟. 我上星期係中環趕時間上office. 由lv 果邊坐taxi 上hollywood road 司機問我點上.....-_-!

xiao zhu said...

Gavin:

利刀架頸果次你又想知呀? 雖然唔算係太複雜,但係喺呢度講又好似長左啲。我諗吓好唔好另外寫一篇呢?

多謝你讚我,或者我覺得係支持我。如果不幸真係遇到呢種處境,一定要作最壞嘅打算。我諗,無論遇到咩問題、困難,最終要面對嘅都只有自己。我只認為,如果冇命,就乜都唔駛講。如果情況是唔能夠改變事實,咁就要盡量將傷害減到最低,如果可以的話。

嘩,你朋友講嘅嘢,聽落都幾心寒!

以我搭的士嘅經驗,整體黎講唔熟路嘅司機又唔係真係好多。不過你上星期嘅經驗,又好似差少少!佢係唔係新仔黎架? 定係九龍司機呢? 不過就算係,中環啲路都應該會識囉。

Gavin said...

係呀! 支持妳, 我覺得冷靜既女性好堅,好怕女仔有咩事只識依情緒行事,嘈, 如果真係俾人侵犯,發顛,受害係自己。

係呀,佢係咁講,講真睇戲都有得睇,唔係朋友親人,要姦左再殺,警方都好難查。特別係女仔如果行山,係荒山野巔, 又真係未必好難,如果埋左屍之後再豎多個石碑係度, 更加無人行埋去或覺得有問題, 真係, 搵鬼知。

所以我覺得成日有警醒既危險意識好緊要!!! 拳頭在近呀! 報警? 嘿

xiao zhu said...

Gavin:

不過有啲男仕就唔鍾意啲咁堅嘅女性架。=P

你講得好得人驚喎,先姦後殺再埋屍,仲要立埋個碑咁變態? 唔係嘛!!

不過你放心喇,雖然我都真係算係幾大膽,但係我點都唔會自己一個人去行山嘅。

Gavin said...

你講得好得人驚喎,先姦後殺再埋屍,仲要立埋個碑咁變態?

--> 係我既[幻想]黎...我覺得咁樣都冇人知...死...唔通我潛意識係.....嘿嘿嘿( 開始進入潛意識中)

一個人行山,熱死人囉...

Anonymous said...

我睇完你幾篇的士故究.其實你會唔會太過過敏感,又或者有少許被害妄想?

Anonymous said...

我以前住公屋,十四五歲既時候,有次同個大姐姐搭lift,我按26樓,佢按22樓.

期間我飲緊罐裝汽水(唔係啤酒),就咁左一啖,咕左一聲,望左一望架lift去到邊層(18樓),又望一望個姐姐.

個姐姐竟然就咁嚇到按20樓出lift逃走!

架lift得兩個人,梗係你眼望我眼架啦,飲汽水唔通有罪?望下都當色狼,唔係下話?

對於平時一表斯文的我,當時真係好hurt!

xiao zhu said...

Gavin:

哦,你幻想啫吓嘛,真係畀你嚇死呀。

嘿嘿,如果講到潛意識,唔,咁每個人都會潛藏左好多意想不到嘅嘢架,可以係好得人驚嘅都唔定架。

xiao zhu said...

魔術師:

嗱,喺唔喺呀,我都話架喇,實有人咁諗格。

你問我,我梗係話我唔係架。咁係唔係,你自己判斷囉,我都冇乜所謂嘅。嘻嘻!

喂,你當年嚇親個大姐姐,你咪話我話嘞,一定係你啲眼神有問題啫。仲有呀,外表越斯文果啲越要防呀。你啲男人都唔知"掟"。

lu said...

唔...我撐xiao zhu"胡思亂想" woh...因為我也會這樣呀!

特別是晚上累得半死下班回家,怎知會不會遇到個"趁你病攞你命"geh司機架?不能掉以輕心呀.想多一步,小心為上!!!

XZ:那你要不要寫遇劫記?

xiao zhu said...

Lu:

多謝你咁撐我呀! Gimme 5!!!

遇劫記? 吓,你都想睇呀? 我仲諗住喺上面答阿Todd 度講左喇。嘩,又換燈膽、又遇劫記,我都未諗到點寫架,啲情節唔係好精彩嘅咋喎。

Anonymous said...

以下請由父母家長鑒定是否容許閣下之未成年子女閱讀~~我的少年陰影! (異級不雅)


我個經歷仲慘痛!!!

我搭LIFT落街﹐ 我見LIFT裡面有個姐姐由上層落黎﹐望了她一眼﹐決定入LIFT﹐恭恭敬敬企埋一角﹐淨得兩個人﹐個時面皮薄﹐唔敢望實姐姐。點知聽到拉拉鏈聲﹐我轉頭一望﹐原來大姐姐拉下牛仔褲拉鏈﹐係度YAU褲﹐見我望o下發生乜事﹐大姐姐咀角冷笑﹐好像說: 「小朋友未睇過呀」﹐ 姿姿油油YAU好條褲後﹐剛剛好到達地下﹐大步行出去﹐仲回頭說聲「拜拜」!!!

﹕(

xiao zhu said...

Space:

嘩,直情應該評為性騷擾喇。你果時幾多歲呀?

我想知道大姐姐講完拜拜之後,跟住其實你個腦諗啲乜啫? 分享吓呢個經歷對你日後成長有乜影響吖。

lu said...

*high 5*

o甘...知道了可以用來警惕自己嘛...

space兄:依家見到著住牛仔褲的姐姐/妹妹會唔會有陰影?(哇~會好唔得閒!o甘多人著牛仔褲....)

xiao zhu said...

Lu:

這幾天很累,讓我組織一下再寫吧。

吓,你提醒我,唔知 space 會唔會自從果次之後,一聽到拉拉鏈的聲音就會諗起個大姐姐呢? :P

lu said...

xiao zhu:唔急!有得睇就得! :P

Anonymous said...

多謝兩位阿姐關心!!!

"我想知道大姐姐講完拜拜之後,跟住其實你個腦諗啲乜啫?"

呆了!!! 一片空白.........


"拉拉鏈聲" 和"穿牛仔褲的" 都對我冇影響﹐直至這一刻也想不起事例!


但呢兩日有反復思量﹐有冇其他的side effect. Ummmm.... 不知這算不算。

我很怕同人有Eye Contact, 一大群朋友圍埋一台談笑唔多覺。一但和人單對單﹐我的眼不敢對著對方的臉﹐遊左遊右﹐望高望低﹐被人誤會! 最慘o的女性以為我望住佢地胸部﹐立即交叉起雙臂。

xiao zhu said...

哎呀,space 呀,畀你笑死我呀。

"遊左遊右﹐望高望低" 你唔係真係咁望人吓嘛? 梗係惹人誤會喇。你係唔係真係咁怕醜唧? 咁你工作上唔會有機會面對面望人嘅咩? 甚至如果你同人傾嘢,唔望住人哋好易畀人誤會你冇禮貌、唔尊重個喎。

不過我覺得唔關大姐姐事。

Anonymous said...

唔係做SALES﹐無須見客﹐聯誼性質的見客﹐通常一大群。我呢行甚少女性高層﹐面對男性老闆問題少D﹐ peers 單對單討論很少面對面﹐通常平排的﹐若一群的不容易發覺喇。 下屬咪更加唔使睇佢面色喇!

最尷尬是 annual ball 時﹐D同事介紹他們的女友老婆﹐穿低胸晚禮服﹐一不小心﹐好似偷窺女士的 cleavage﹐ 鬼妹有D會好自豪﹐asians 就斃o勒!

xiao zhu said...

Space:

唔好意思呀,我真係忍唔住又笑喇,真係好鬼好笑呀你!嗱,我唔係笑你呀,我意思係你講得好好笑咋。

突然諗起"同事三分親" 裡面果個婁華呀,呢期都好似都幾紅喎。

lu said...

space兄確實詼諧. :P

我媽和我都是婁華的fans.哈哈哈,有他的那集看得特別開心. :P

但...xiao zhu...你不是很忙嗎?!居然還會留意到"同事三分親"和婁華!

xiao zhu said...

Lu:

吊頸都要抖吓氣嘅。我平均一個星期加埋都會睇到大概1.5集嘅同事三份親架,幾多!所以同婁華都有數面之緣嘅。 ^_