氹氹轉，菊花園

上星期古思哲踢了我。有點奇怪，這個 tag 其實很普通，問題不甚吸引，又不算是甚麼有趣的，（跟我個多月前答過的都一樣普通，）但卻似乎很多博客都有寫及的。為了較易作答，哈哈，我沒有跟隨規矩，參考了其他博客的，改動了數個題目。


1. 小時候的理想是什麼？
（理想唔同志願架可？）世界上再冇人捱窮。

2. 這輩子最快樂的是什麼事？
喺最意想不到嘅時候同自己鍾意嘅人一齊。

3. 你喜歡的顏色？
紫色

4. 你有多久沒有傻笑了？
冇幾耐之前（對住個 mon）

5. 你最想去哪個地方？為什麼？
最想去邊度就唔想講。至於點解想去？想搵人。

6. 最受不了自己哪個缺點？
懶囉……呀，咪住，唔係，其實答案應該係「冇」呀。唔係冇缺點，而係冇乜缺點係自己受唔住嘅。不過懶散就的確係我最大嘅缺點。

7. 如果有不開心的事情，你會怎麼辦？
收埋自己一排，到咁上下時候就出番黎。

8. 四季裡喜歡哪一季?
秋天！秋天！秋天！

9. 五年內比較現實的目標是什麼？
雖然時間過得快到令我震驚，呢一刻問我，覺得五年都係太漫長嘞，可能係受過去五年嘅影響太深；仲要係「比較現實」添？咁我更加答唔到。

10. 如果你得了絕症你會跟家人講嗎？
會嘅，不過未必即刻講，要睇吓係咩絕症、嚴重程度、同可能用到嘅治療方案，仲有要睇吓會有幾多時間剩。

11. 說出你對點你名的人的觀感。
對思哲有份特別感情，因為佢係早期首先到訪我個 blog 嘅其中一人。佢，好感性。覺得佢要追求嘅嘢，其實係好簡單，不過佢仲未理清啫。唔緊要，佢仲年青。

12. 孤獨是什麼？
一個人囉。（我諗原作者呢度嘅意思係解寂寞多啲。）

13. 喜歡什麼類型的人？
有內涵、心地好，嗯，要叻。（一定唔可以悲觀，咪實會同我攬住一齊死。）

14. 你對你的近況滿意嗎？有什麼需要改變？
如果話唔滿意，自己都會覺得有啲唔好意思，因為幾時都係大把人慘過我。不過真心去答，係真係唔滿意。需要改變嘅，而又可以自己話到事嘅，就只有自己。

15. 你會用什麼方法去面對討厭的人？
一般情況下會若無其事咁。盡量唔會俾一啲自己唔鍾意嘅人影響自己嘅情緒咁笨。

16. 去過最美的地方是哪裡？
諗左好耐，諗唔到。

17. 你吃過最好吃的是什麼？
某年端午節同朋友去望夫山，（當時大家貪得意，我話邊個話端午節一定要游水架，我偏偏就要去行山。 [哈，其實係因為我唔識游水就真！]）問題係冇準備嘅情況下就去左，水都冇支，結果渴死咁滯。返到市區喺油麻地一間茶餐廳一坐低就叫左杯菠蘿冰，嘩。係咁耐以黎最美味嘅！

18. 如果能讓你實現一個願望，會是什麼？
所有嘅願望都能夠實現。

19. 喜歡怎樣的二人世界生活？
兩個人囉，兩個人可以一齊就點都得。

20. 你曾經愛上過同性嗎？
冇。調轉就有！


無甚新意，這個「氹氹轉」不再轉下去了。（本來心目中倒有幾位網友想踢的，因為他們都很少接這類的 tag，但又怕他們不喜歡，為免為難，還是作罷了。）