修理水箱的女子

A：「喂。」

G：「喂，做咩咁嘅聲氣嘅？」

A：「係呀，整緊廁所呀，唔得閒同你傾住，一陣打番畀你吖。」

G：「OK喇，你慢慢，傾閒偈啫。」

。。。。。。

G：「喂，搞掂嗱？」

A：「搞掂左嘞，竟然畀我整番好喎！」

G：「究竟咩壞唧？」

A：「廁所水箱囉，冇左水兩日。我初初以為係大廈冇鹹水，點知管理員話冇問題。想搵人整，但係呢兩日又鬼咁忙，日頭邊得閒返黎啫。」

G：「咁你咪有個 friend 住喺附近做裝修水電嘅，你以前都係搵佢格。」

A：「就係成日搵人唔好意思架嘛，唔係真係好熟架咋，佢又唔肯收錢。我都諗住今晚再睇吓點，唔得都要 call 佢黎架嘞。哈，點知畀我整整吓又得左喎，幾開心呀。」

G：「你得架喇你，咁不如你禮拜過黎幫我睇睇個洗衣機啦，好似有啲唔妥喎。呀，駛唔駛考番個水電牌咁呀！」

A：「哼，我有諗過架。你唔駛窒我，其實牌就唔駛考，我真係想去學吓修理水電架，叫起手有問題都可以整到吓嘛。」

G：「畀你激死呀，咁你而家都整到吓啦，你真係好得閒咩！」

A：「廁所水箱呢啲都可以叫做簡單啲嘅 mechanical 嘢，拆左都可能砌得到，但係其他啲電器……」

G：「喂喂喂，你認真架！好心你啦，你要整啲咁嘅嘢咪叫換燈膽果個做囉。點解要自己咁辛苦唧？」

A：「唏，我講過幾多次呀，都話佢淨係換燈膽個咯。」

G：「阿姐呀，咁間中整埋廁所都得啩？」

A：「梗係唔得啦，都話左唔得咯。而且佢都唔識，分分鐘我仲掂過佢。」

G：「咁你打算一路都淨係畀佢換燈膽咋？」

A：「唔係呀。我有一日呢，落到樓下見到8C 個陳太叫阿曾上去同佢整電掣喎，我諗第日我都可以叫佢上黎幫吓手架。仲有呀，我有一次喺度諗，如果我有錢呢，就揾人幫我設計啲燈呢，可以遙控升降嘅，咁換燈膽咪唔晒驚囉。」

G：「嘿，唉，我都唔知點講嘞。喂，但係你連廁所都自己整埋，咁你仲駛……」

A：「我知你想講咩嘞，我冇問題喎。」

G：「其實如果你想呀，大把人……」

A：「唔駛講，我知。你都講左出黎啦，如果我想吖嘛，咪就係囉。」

G：「蝦，你唔好餐餐都窒住晒啦，硬係唔畀我講落去。唔講唔代表個問題唔喺度架。」

A：「我知道你緊張我，我真係OK 喎。」

G：「你打算係咁奔馳落去呀？你都要知掟返屋企至得架。」

A：「哈哈，我阿媽派你黎架？」

G：「仲笑，認真啲啦！」

A：「我不嬲都好認真固喎，你知格。」

G：「就係咁至驚，你繼續咁天空海闊呀，驚你越飛越遠唔返黎呀。」

A：「就算係，都未必係壞事吖。」

G：「咁你……唉，咁我收聲囉。」

A：「唔好咁啦，我諗我都唔會唔識返嘅，你要對我有信心喎。」

G：「好嘞，肥佬叫你禮拜唱 K 呀，黎唔黎呀？」

A：「梗係黎啦！」

G：「咁兩點上黎喇。」

A：「OK，我買 cheese cake 吖。」

G：「帶埋士巴拿呀，拜拜。」

A：「Bye。」