Tuesday, June 19, 2007

第一個上我家的男孩---C.M.T.(四)


放學的鐘聲終於都響起了。我快速地把書桌上的書、簿和筆盒全都放進書包內,第一時間站起來走向門口排隊。好不容易才等到所有同學都集合了,便魚貫離開課室。

我們三年級的課室是在三樓的;一路下樓梯,我偶然回頭看他,見他只管低著頭兒走,好像沒有注意到我在看著他。本想跟他有個眼神交流,想再次得到一個肯定。只是他都沒有看見我呢!

學校的正門終於在望了,我的眼睛急不及待的往媽媽慣常站著的地方看過去,媽媽已經在等著呢!太好了!雙人並排的隊伍隨著接近校門口而漸漸地分支流散了。

我急步走向媽媽:「媽,快啲走喇,快啲返屋企喇!」邊說邊拉著媽媽的手就走,連平日第一時間把書包交給媽的動作也忘了沒做。

「做咩今日咁心急呀?!」媽媽一路問,一路把我的書包從我的肩膀上拉了過去。

「我叫左丁志明黎屋企一齊做功課呀!」完全忘記了還沒有問媽媽的批准呢!

「丁志明?」

「好慘果個丁志明呀!」心裡想,怎麼媽妳忘了嗎?

「啊,你話佢爸爸媽媽離左婚果個同學……」

也等不及媽媽說下去,「係嘞,就係佢囉。上次見到佢買牛肉果個呀!佢好慘呀,英文測驗唔合格呀,屋企原來冇人教佢做功課架!」就在這一刻忽然想起,「呀,媽,得唔得呀?」心裡焦急起來,如果媽媽不准許他來,那怎麼辦了?

「咁你係唔係已經叫左佢下晝黎吖?」

我不敢望著媽,低下頭去,點點頭。

「嗱,下次記得要返黎問左我先呀。你咁細個好多嘢都唔識,我都要知道你個同學仔係點先得架嘛,知唔知道呀。」媽的表情雖然嚴肅,但是她的語氣卻是溫和的。

「知道喇,我下次唔敢架嘞!佢唔係壞人黎架,佢上堂都冇傾偈,返屋企又做家務,佢好乖架。」抒了一口氣,心想,哼,以我八年閱人的經驗,我知道丁志明是個好人,嗯,我準不會看錯的!

每次吃飯的時候,媽總要囉嗦著我吃得太慢,常常問是不是我的飯碗下面有個火爐熱著。也是的,平常每一餐飯我起碼都吃上了一個多小時;可是今天的午飯,我不消半個鐘頭就已經吃完了,媽也很詫異。

媽已經把飯桌清理好了。看看牆壁上的時鐘,不過是一點四十八分。盤算了一下,丁志明說他會兩點多到來,那究竟是兩點幾分呢?人家說,無三不成幾,那他應該會在兩點零三分之後隨時出現的了。噢,還有十多分鐘就是了,不期然更加緊張起來;畢竟,我從來都沒有邀請過朋友上家裡來。

把書包拿到飯桌上,拿出了今天要做的功課,一本一本的疊放在桌子上,再拿出筆盒來,就把書包往地上放了。應該先開始做功課,還是等他來到的時候才一起開始呢?我們不是說一起做的嗎?但是,如果我先做,有甚麼難的題目,我也可以先想想怎麼做,到他到來的時候,也可以多點時間教他吧。看,我就是想如果我不懂的,他都一定不懂的了。好,就這樣決定了。

今天的功課有中文寫字練習、英文課本練習、算術題目、聖經金句抄寫;我特意先做英文練習。心裡就是安定不下,差不多每三、四分鐘就往牆鐘看過去。兩點二十六分了,怎麼他還沒有電話來呢?不是說好他會先掛通電話通知我嗎?怎麼還沒有來呢?很是著急。

兩點三十七分了,還是沒有動靜,連媽都來問我:「你約左丁志明幾點架?」

「佢話兩點幾囉。」會不會是迷路呢?那怎麼辦呢?

「佢識唔識路黎架?」媽再問。

「佢話識架,我仲話畀佢知斜對面係XX戲院,佢話識架。」心裡開始胡思亂想,會否在過馬路的時候……真不敢想下去了。

突然門鈴響起來,是他?

立即飛奔去應門,打開大門,站在鐵閘外面的正是丁志明!

「咦,點解你咁晏嘅?點解你唔打電話畀我呀?我咪叫你打電話畀我先嘅咩?……」

「你做咩仲唔開門畀人入黎呀!」媽跟在我的後面。

方才發覺自己正沒頭沒腦地隔著鐵閘只管問;趕快就開門讓丁志明進來了。

「你就係丁志明嗱?」媽媽問。

「嗯,姨姨。」他微微低著頭應了我媽。

「黎喇,入黎坐喇。」媽笑著說。

我只管領著他坐到飯桌邊。「你坐呢度吖。」

我的心情由緊張、擔心,到這一刻的興奮,都變化得太急速了。


。。。。。。

46 comments:

英倫肥龍 said...

燒豬,

張圖好得意喎, 你畫架?

你真係好犀利, 咁細節都記得.

xiao zhu said...

肥龍:

你咁快嘅!^_

幅圖係喺網上揾架,我邊識畫呀。真係好得意啊呵。

我幾好記性架,有好多細節我真係記得好清楚架,一個個畫面咁播番出黎,好清晰。最緊要係個感覺仲喺度。

不過咁,為保護佢嘅私隱,裡面有啲情節係改動過。

英倫肥龍 said...

係呀,幅圖好得意,好啱成個mood. 另外, 你講得啱, 最緊要個感覺仲喺度, 應該寫番出黎回味吓.

不過, 燒豬你既文筆真係唔錯, 描述好立體好生動.

咁後來你媽咪有冇"招呼"佢呢? 我指"茶點"呀...^^

xiao zhu said...

肥龍:

hehe,我都希望大家睇得愉快,因為我自己一路寫,一路回憶,感覺都非常良好。

其實我本來諗住會寫晒成件事架,點知道寫左一半都已經咁長咯,咁唯有繼續要出C.M.T.(五)去交待下文囉。:P

Old Cake said...

"人家說,無三不成幾,那他應該會在兩點零三分之後隨時出現的了。" I like this line. It is so cute! :)
Well done. ^_^

暗黑的卡夫卡 said...

一路寫,一路回憶,感覺都非常良好。

YES YES YES

Keep writing...

We feel good reading it too :)

aulina said...

我啲細路又係成日問可唔可以請同學仔返嚟屋企玩,寫得好童真呀,當然文筆唔似小朋友,但係個心境好可愛。

Carrie said...

Looking forward to the following chapters...

xiao zhu said...

老餅:

我自己諗番當時呢個諗法都覺得好好笑。好開心你都捕捉到。^^

xiao zhu said...

K,

Glad you like it, and thanks for your encouragement. ~_~

xiao zhu said...

Aulie:

其實一開始我都冇諗住用小朋友嘅文筆去寫。第一,技術上當然會有難度,(要做嘅話可能會變成造作。)而最重要嘅係我嘅目的並唔係想咁。我係想用番一個大人嘅眼睛同情懷去回憶自己的童年,有啲地方會黎得細緻一啲(希望做到),亦會有啲地方我刻意唔太明顯表達,但又希望睇嘅人會有一啲特別嘅感覺。(未必成功。)

我會建議你畀你嘅小朋友帶同學返屋企玩,咁樣可以等佢哋形成一種習慣,畀你多點認識佢哋嘅朋友、佢哋嘅世界,日後佢哋再大啲,絕對幫到你同佢哋嘅關係同溝通嘅維繫。咁當然要定清楚規矩、條件,執行上會好啲。^_^

xiao zhu said...

Carrie,

我會努力架喇,唔好催我呀。:P

Gideon said...

好以仲有排先會完,努力﹗

xiao zhu said...

鐵鎚:

唔係呀,應該就完架喇。

話時話,由琴晚到而家,我一直都入唔到你個blog 呀,老餅都話去唔到呀。你check 吓喇!

The Inner Space said...

唔係呀,應該就完架喇。


真繫被LU估中“不祥”?  就在府上有事發生?  

lu said...

>>哼,以我八年閱人的經驗,我知道丁志明是個好人,嗯,我準不會看錯的!

哈哈!xiao zhu厲害!我八歲的時候依然是一舊飯. :P

北夫人 said...

係你既真身經歷呀?勁喎,小三既野都記得

我大部分童年回憶都好模糊,可能因為我的童年並不偷快,所以很自然地不想記起,漸漸便忘記了

xiao zhu said...

Space:

係呀,我諗個故事寫埋下一篇都應該講完架嘞。

咁你expect 喺我屋企有咩事發生吖?

xiao zhu said...

Lu:

"係呀,我真係識分架!" 八歲嘅小豬話喎!

:P

xiao zhu said...

喵喵:

每個人嘅經歷都唔同,記得又好,唔記得又好,最緊要係希望妳而家同將來都過得開心。如果我呢幾篇妳覺得都幾好睇嘅話,咁唔開心嘅時候咪黎睇番吓囉。^_^

樂遊 said...

一個積極而乖巧的女孩

「以我八年閱人的經驗,我知道丁志明是個好人」
細路女,你都幾老積wow。

新鮮人 said...

愈睇愈覺得你細個時鬼靈精怪呀~~
:p 

Anonymous said...

小豬妹妹:

我今日開左大半日會呀,要遲d先交到貨呀!

不過,先俾個後記你睇下先:

從C.M.T.(四),魔術師看到的是一幅幅害羞小男孩的影象,更加有天真小女孩的影象,我最喜愛的,除了「奇怪媽媽怎麼忘了丁志明」、「閱人經驗」、「無三不成幾」的心理描述之外,就是「吃飯速度」.我喜歡看別人的生活小節,因為人性往往就從他們的習慣裡顯露出來.

xiao zhu said...

樂遊兄:

而家睇真,八歲嘅小豬又真係好似幾可愛咁噃。

佢個腦又的確係堆積左好多嘢架! ^_

xiao zhu said...

新鮮:

hehe,唔單止細個嘅時候古靈精怪、牙尖咀利呀,而家都係架,仲好百厭、貪玩添呀。

^_*

xiao zhu said...

魔術師:

梗係要做正經嘢先喇,你慢慢喇,唔晒急架,雖然我都真係好心急想睇。 =P

睇左你段後記,我真係好開心呀!真架!!

said...

好溫暖o既故仔啊...
得五集咁少?

其實有無諗過去尋人,搵番阿明仔呢?

Anonymous said...

:) 從文裡看到妳那時的情意。

Anonymous said...

小珠妹妹:

魔術師散文系列之C.M.T.同人誌 第四話 第一個令我有感覺的女孩

經已出版.

xiao zhu said...

米搞:

五集都嫌少呀? 我原本都冇諗過寫咁長架,真係寫小說咩。

尋人? 嘿嘿,你已經make左啲 assumption 嗱。嗯,睇吓點喇。

xiao zhu said...

悠:

你看到嗎? ^^

xiao zhu said...

魔術師:

你真係好快手呀。你考慮得好週到喎。^_

Todd said...

好可愛呀! 第一次見家長,梗係緊張D架喇!

但邊有女仔咁主動架,八歲的小豬,大左你就明女仔係要D矜持呢! =P

5集咁少,我好鍾意CMT呀,好COOL,又有神秘,仲係"少女"殺手,型呀!

xiao zhu said...

Todd:

咩喎,呢啲叫做坦率、真誠呀,幫人我不嬲都主動架喇,有咩問題唧!而且,法例有規定女仔唔主動得嘅咩? 矜持係要睇吓對住咩人喇。

畀你哋講到我都好似有啲唔捨得添。其實我都仲未寫第五集,未諗清楚,不過就算唔一集都會兩集點都完架嘞。故仔點都一定有講完嘅一日嘅。大家睇得開心就好喇。^^

Todd said...

幫人係好,但,邊有人幫人幫到忐忑不安,盤算住兩點零三分,係咁望住個電話架! 八歲的小豬,大左你就明喇,呢D係叫少女情懷呢!

我真係好唔捨得CMT呀,咁呢輯完左,不如寫個番外篇丫! =)

xiao zhu said...

Todd:

咁人哋係未試過請同學仔返屋企,唔知道會點樣架嘛,小豬向來都係心急嘅人黎架。三歲定八十嘛!

你咪真係以為八歲嘅小豬唔識至得架,你想睇真正嘅"少女"情懷,我都可以考慮遲啲寫吓架。

CMT外篇? 你expect 寫乜嘢呀?

Haricot 微豆 said...

我回想八歲時,对異性的感覺是非常「新奇」,其實是與 self development 和 self identification 有關。那時荷爾蒙未多,推動力主要仍是友情。

您寫得非常好,仔細的描述,就把讀者帶回我們忘記了的童真年代。

Anonymous said...

其實....我考慮左d乜野令你覺得週到呢??

Anonymous said...

兩小無猜,純真友誼。。劇情吸引,繼續追下去。。。你省了[字詞驗證],真好!不然我每次都要折騰幾次,哈哈。。

xiao zhu said...

微豆:

我還留童心嘛!:P

希望在你這段繁忙的日子裡,這裡為你帶來的點點童年回憶可以讓你鬆弛一下。^^

xiao zhu said...

Lilac:

多謝你繼續收看啊!^_

xiao zhu said...

魔術師:

你執筆前的考慮,以至最後 Susan Wong 的歌聲,都顯示你思考的週到和完整。還有,很喜歡"每當手指順著那撥輪去到盡頭,便飛快的往回撥,彷彿這樣做便可以快點接通." 這個描述,很真實,我也是這樣的。

Todd said...

真正嘅"少女"情懷,要睇呀!要睇呀!要睇呀!!!!


CMT外篇...睇吓你同佢有乜野發展先啦! =)

Anonymous said...

好開心你咁讚我呀!真架!!

xiao zhu said...

Todd:

嘩,我突然諗起我好似仲有啲故仔未講喎,嗱,遇劫記喇,換燈膽嘅男人喇(呢個都係冇咩好講),而家又少女情懷。等我諗吓點寫先。

xiao zhu said...

魔術師:

你做咩學我呀!:P