Wednesday, April 25, 2007

的士奇遇(二)

圖片摘自http://xcjx.org/infoview.asp?id=7038


看看腕錶,已經七點二十分了,要遲到了,媽一定又在咕嚕咕嚕了。

抱著古箏要在彌敦道大街上找的士,實在狼狽。走過了兩條橫街,站在路口等。心想,哼,總是這樣的,總是這樣的!你不要的時候,就滿街上都是沒載客的的士,當你想找的時候,就是找不著。

好啦,終於有一輛向我的方向駛過來,幸好前面沒有其他人候車。車子停在我面前,車門自動打開了。小心翼翼地先把古箏放進車子裡頭,要斜架在前座的椅背上,然後自己也歡天喜地的跳進去,關好門。

「唔該青衣盈翠半島吖。」

「好呀。」那司機回應得很輕鬆爽快。

車子開了還不到一分鐘的時間,那司機突然說:

「小姐,我車過你架喇。」(咩話?)

「吓?!」(唔係嘛,咁樣識女仔?)

「我以前車過你架喇。」(揾條好啲嘅橋吖,當我白痴架!)

本能反應,就是聯想到一些不好的事情。於是把身體稍向右邊移動,頭也輕側向右邊,嘗試看看前面的司機名牌上的名字跟樣貌,還有把車牌號碼記下來。天已經黑了,街上店鋪照進來的燈光掩映不定,所以看了一會兒才肯定他的姓名(姑隱其名)。正當我繼續努力的想看清楚他的照片,他又說:

「我記得喇,應該好似係兩年幾前。」(嘩,你都好誇張啫!我坐的士點都少過你載客喇,我都唔認得你,你竟然認得我?你點作埋落去呀?)

「你咁都記得?」仍然很鎮定地問他。(睇吓你點答。)

「我認得你把聲先嘅。你上次都係去盈翠,又係咁講法吖嘛。」(唓,講嘢呀,咁多人去盈翠,我唔信你兩年來淨係載過我一個客去嗰度。而且唔係咁講咁點講呀,廢話。)

他又說:「我仲問你係唔係喺電台做嘅添,你話唔係。」(咦,又好似有啲印象喎!)

他繼續說:「係半夜三點幾,你一個女仔喺斧山道上車嘅,係嘞,我記得嘞。係你嘞,而家再睇番你個樣,我肯定呀!」他邊說,邊昂起頭從倒後鏡看著我。「你記唔記得呀,你話咗唔係做電台嘅,我跟住問你係唔係拍戲嘅。你又話唔係。」

呀,我也想起來了。對呀,他說得對呀,那個半夜,我真的曾經在釜山道乘的士回家。是真的!

可是,他怎麼會記得?還記得那麼清楚!兩年多前,他能記得那麼清楚!莫非他有過人的記憶力?想到這兒,本來有的憂慮比較放鬆了,反而很好奇。

「點解你咁好記性嘅?連講過啲嘢都記得哂。」

「唔知喎,我平時唔係話特別好記性個喎,不過就真係好記得載過你囉。」

「係咩?」

「可能你把聲又好聽,你又靚女喇。」(死,今次衰多口添。)

還是不去回應會比較好。

他又從倒後鏡一瞄:

「小姐,你唔駛驚,我唔係口花花架,不過你問我,我答番你咋。」

「嗯。」稍微點一點頭。

也再沒有對話了。一直到了目的地付錢的時候:

「唔該。」

「多謝。唔知會唔會再有下一次呢?」

他的神情倒沒有甚麼,我只可以輕輕報以一笑,下車了。

36 comments:

kish2601 said...

helo sry i only can type english but i can read chinese i like ur story "的士奇遇" haha u r same wif me i also goin to write a novel in my blog but i havent finish yet hope u can contiue it i lookin forward to it

vicky said...

如果個司機唔令人反感的話, 可以叫呢d做緣份.

aulina said...

奇...

類似經驗:返工時撞口撞面但從來唔會識嘅過客,但係又認得佢個樣個喎...

Anonymous said...

urptui你的故仔都好consistent o播﹐上次在青衣買happy feet DVD, 今次去盈翠半島。

上次在新圃崗斧山道上車﹐今次在彌敦道﹐相距都幾遠。 個的士司機都認得你﹐那一定如司機大佬話齋﹐把聲靚又靚女喇﹐兩年幾唔會變得很多!

就係咁樣開始? 就係(一) 果個的士司機專登兜來搵你?

Anonymous said...

ops sorry "urptui" was your word verification inadvertently included.

Haricot 微豆 said...

Xiao Zhu: When I travel in unfamiliar territories with potential security risks, I usually have my mobile/cellular phone in my pocket. If I don't feel comfortable with a stranger, I will keep my distance, make a call (or pretend to make a call) and say loudly where I am. One could do the same inside a taxi. If there is a gang, I will run and get the hell out of the situation. I am glad to hear that the taxi driver you encountered turned out to be decent 正派. It is quite obvious you impressed him two years ago!! You should still be cautious though - you still don't know him.

Anonymous said...

換下對白,可以變成鬼古......原來N年前車死個靚女後不顧而去,點知會撞返 :)

. said...

有一次我在广州,晚上睡不着,坐的士游车河,天河到芳村,整个城市转一圈。

的士司机是个17岁的小家伙,连驾驶执照都没有,开车又快又猛。(他说他的驾照是花钱顶别人的。)

整个晚上,是听他的闯荡经历,和他对一个中学女老师的痴恋。为了她,他想回去读书。

很难忘的一个晚上。也大概花了两百块的士费。

留了他的电话,可惜不见了。

Todd said...

嘩!原來小豬人靚聲甜,失敬!失敬!

不過,就算點靚,的士司機一日載咁多客,兩年噃,冇理由記得呢!一定要D野...

xiao zhu said...

Hi, Kish,

Welcome. Glad that you like the story. Well, I'm not really writing any novels or plays. Just some bits and pieces of lives. So would you still come? Ha!

You're not in HK, are you? ^_

xiao zhu said...

Vicky,

唔,緣份。所以我把這段經歷放在"奇遇"的命題底下。但是還記得的士奇遇(一)嗎,不敢亂來了。

xiao zhu said...

Aulina:

如果返工時撞口撞面,一來會看得清楚一點,二來,遇見次數應該會多些吧,會容易認得的。但是兩年多前,半夜三更黑媽媽,又只是見過一次,咁都記得咁清楚,連講過乜都噏番哂出來,唔奇怪就假喇。

xiao zhu said...

space:

似乎你記性都唔差喎,仲記得我講過喺青衣買Happy Feet!

咩專登兜來搵我唧,兩個唔同嘅人黎架。

"那一定如司機大佬話齋﹐把聲靚又靚女喇﹐兩年幾唔會變得很多!"

嗱,即係咁,我份人係衰呢,我一定認,係好呢,我都唔會妄自菲薄、懶謙咁嘅。呢件事並唔係最近嘅事黎架嘞。我諗我應該話,係,我曾經靚過。嗯,係嘞,咁樣講就最恰當、最貼切嘞。

xiao zhu said...

Haricot,

Yeah, you're right. That's why conversation just ended at that point.

xiao zhu said...

譚兄:

好呀,你寫吖。真係喎,不如你寫喇!^_^

xiao zhu said...

量子:

我其實真係有衝動想跟他再談,實在是很有趣的一次經歷,只是有太多現實的顧慮了。

我代入你那個晚上的經歷,也挺有意思啊。

xiao zhu said...

Todd:

我靚唔靚,請睇番樓上我答阿space果度,以正視聽。^_

"兩年噃,冇理由記得呢!一定要D野..."

事實真係咁喎!所以我咪覺得好奇怪囉。咁你話嘞,會有D咩嘢嘞??

C.M. said...

十室之內,必有大賢。原來香港都係,大隱隱於市

xiao zhu said...

CM:

Thx for coming! :)

你係話...個司機?

Silence said...

"「可能你把聲又好聽,你又靚女喇。」"

xiao zhu快啲post你張靚相上嚟喇!! =]

Anonymous said...

小朱姐:

懂演戲﹐識得寫劇本﹐能演能編!

又識得古箏﹐唱歌﹐詩詞﹐評畫﹐寫影評﹐月旦時事﹐琴棋書畫樣樣皆精! 才女也...女的陶傑!

xiao zhu said...

靜妹妹:

做咩唔正經溫書呀!

Post 靚相?第一,我係電腦白痴,唔識搞啲咁嘅嘢。第二,我上面都答左阿space,我只係曾經靚過,唔通畀啲發哂黃嘅相你哋睇咩,唔好喇。^_

xiao zhu said...

space:

你又喺度發揮緊你嘅創意嗱? 我發覺你原來係有間歇性妄想症架!

演戲---係人都識架喇,冇乜咁特別呀。

寫劇本---唔係將啲文字頭尾加個引號,加加埋埋就係劇本架!

古箏---的確係學過吓,但係冇彈好耐,畀番哂老師喇。

唱歌---我都話我唔會妄自菲薄嘅,呢樣都還可以。

詩詞---喺香港讀書個個都有唸過吓唐詩宋詞架喇。

評畫---我真係唔識架,我淨係會講"我鍾意" 同 "我唔鍾意" 架咋。

寫影評---嘩,唔好畀Mad Dog見到添呀,佢先係專家,我果啲都唔係路嘅。

月旦時事---喂,我真係冇乜主動寫呢啲嘢個噃!最多都係喺人哋個地盤搭吓訕,三兩句咋噃。我覺得你喺度月旦緊我多啲啫。:P

琴棋書畫---琴,上面講左喇。棋,我淨係識捉波子棋同飛行棋。書,都叫做學過吓書法,老師都讚我有啲多天份,最弊係我懶呢,冇恆心囉。畫,除左中三畀老師攞過我一幅油畫參展過啲唔知咩咩嘞之外,都冇再畫過畫囉喎。

才女---你係真係有心讚我嘅就諗過第二啲叫法喇,而家係人都話係才女,咁cheap!

女的陶傑---你咁仲唔係月旦我??我諗呢度睇過吓我個blog嘅朋友,睇到你咁講都會笑呀,係笑我呀!再講,陶傑冇錯係有料,但係我唔鍾意佢個噃!

唉,真係畀你玩死呀!

Anonymous said...

我一個女仔搭的士都好驚的士司機搭訕架. 我通常見佢開始想搭, 我就會拎個電話出黎, 同人講: 喂我搭緊的士黎緊架啦. 而家? 咪係邊度邊度咁羅.

但你呢次真係奇遇喎... 不過, 就算係咪, 我係你, 都驚驚地...

Todd said...

個的士司機,一定唔只係的士司機,可能仲學過古箏,教過書法,去過畫展,蒲過卡拉OK,...有D野呢!

Todd said...

仲有呀,你唔識post相,send俾我呀,我幫你搞掂,仲可以教埋white balance,由黃轉白添! =P

xiao zhu said...

Todd:

你講漏左喇,佢仲有睇埋話劇、同去戲院睇戲添呀。

真係畀你激死呀!

Post 相? 咦,真係唔好玩喇!唔想你哋睇完噓聲四起呀。

xiao zhu said...

紫熊:

間中都會有啲阿伯鍾意一路聽收音機,一路回應吓節目講緊果啲話題,咁呢啲我都會禮貌地答一兩句嘅。其他啲擺明撩女仔嘅,梗係唔睬佢喇。

係驚架,遲啲我寫埋第三集,果次就真係驚險架。

樂遊 said...

之前你有數篇對話,很精彩呢,引出很多想像(雖然無留言),想不到此篇給人「耳目一新」,想像空間變得無限大!要不是實錄,我倒會以為是以前那些tom hanks , meg ryan一類電影(When Xiaozhu Met Taxi?哈!)的劇情。
話說回來,我是很怕喜歡談話的的士大哥。

xiao zhu said...

樂遊兄:

看到你這樣的feedback 令我很高興。多謝!
說真的,我的奇遇也不少呢。

遇上太絮絮不休的的士司機,也真的很煩。

Anonymous said...

嘩, 嚇死喎!

xiao zhu said...

MD:

唔駛驚,唔駛驚!冇事冇事!

macy said...

嘩!佢咁都認得你, 你真係多奇遇, 我都認為你絶對係人靚聲甜, 秀色可餐! ^_^

我都想去撞下你喎!

哈哈!

呢一段直頭可以當劇本咁寫...

xiao zhu said...

Macy:

係囉,唔知點解我特別多啲奇怪經歷。

我上面都講左喇,我只算係曾經靚過喇,再唔係,充其量或者係各花入各眼啫,不足道,不足道。

講講吓,真係諗吓好唔好寫個劇本呢。

Anonymous said...

係o勒!!! 人靚聲甜, 秀色可餐!

應該好會似法籍女星﹐Marion Cotillard 美得黎又有著無盡餘韻個類,小朱姐曾特別提供請看
A Pretty Woman



女性通常gave compliment to women look like herself !!! 或者更靚D!!!!

xiao zhu said...

space:

星期日一早起身你啲間歇性妄想症又發作嗱? Marion Cotillard,咁都畀你諗到? 簡直無限欽佩!!

不過咁都好,証明你真係好捧我場,而且真係有用心睇我啲文,多謝你呀!^_

"女性通常gave compliment to women look like herself !!! 或者更靚D!!!!"

好似好了解女性咁喎!其實你都講得有啲道理嘅,我係話呢個都算係一個現象。但係你咁講因住容易得罪人喎,好多就算自己唔係咁靚嘅人,都好識欣賞其他靚人、靚物個喎。