當水火相融時．．．

水水：「你做咩呀，咁唔開心咁嘅？」

火火：「好激氣呀！班友仔都唔係路嘅！」

水水：「邊個咁衰激嬲你唧？講俾我聽吖。」

火火：「嘿，一個二個駛人唔使本嘅！個個一日到黑都老點我，不特止，點完仲跟住係咁開行把牛角扇兜口兜面係咁吹我，唔夠仲人手攞扇黎係咁潑。大佬呀，我都唔知點分身，要我呢度去、果度去，係咁點、係咁潑。喂，吊頸都要唞吓氣喇，想做死我咩！」

水水：「咁聽落你又真係幾辛苦、幾操勞嘅。唔好咁嬲喇，嗱，我至多俾你呷番兩啖，唞吓、降吓溫嘞。」

火火：「唉，都係你溫柔體貼。老實講，我都唔明，啲人係唔係食飽冇嘢做，係要搵啲嘢搞吓至安樂吖？搞到週圍都好似火焰山咁，咁都唔住得人喇，佢地冇諗過咁對自己都冇好處嘅咩？......你就好喇，喺度咁他條。」

水水：「講出黎就你睇我好我睇你好咋，其實我都忙到抽筋架。嗱，你就成日畀人係咁兜口兜面潑吖，你知唔知果啲老爺有理冇理係咁將我潑出去呀？真係搞到我三魂唔見左七魄架。」

火火：「吓，你都咁慘架？唉，咁我哋都算係同病相憐囉。老實講吖，我真係覺得自己懷才不遇架。」

水水：「搞錯呀，你做到氣咳個嚕喎，仲話懷才不遇？」

火火：「唏，弊在啲人唔識用我呢，我覺得我係可以發揮得好啲架；如果佢地識用我，我可以幫手燒旺吓個地方，等啲人有動力去再搞好啲，正所謂水漲船高，咁呀，大家先有好日子過架嘛。都唔明班友仔讀咁多書，讀乜鬼嘅。根本就各懷鬼胎、自私自利。」

水水：「咁講法，我夠懷才不遇喇。唉，佢地好多時都唔理三七廿一就將我潑去人地度，一啲都唔識得珍惜我嘅，仲有呀，去親都係果啲已經裝滿晒幾廿百個大水缸嘅，再唔係有時仲會逼我去和番添呀，咁樣益外人，正漢奸呀。其實如果佢地畀我去多啲乾旱嘅地方，咁咪多啲人可以受惠囉。」

火火：「講真，都唔係個個都咁衰嘅，有啲人都真係知道點樣去善用我哋，不過都係屬於少數囉。」

水水：「咁點都好過冇嘅。」