Sunday, August 05, 2007

我的第一杯奶茶


「媽,呢個袋要黎裝咩架?」

「車好再話畀你知。」

媽媽繼續踏著縫紉機,不消一刻,便縫製好一個白色小布袋來,大概是12厘米乘16厘米吧,袋口是用白棉帶子拉索式的。

「要黎裝咩架,快啲講吖!」已經急不及待了。

「裝茶葉。」媽媽笑著說。

「裝茶葉?乜唔係用個罐裝咩?個袋咁細!?......」

爸爸媽媽在家是喝茶的,而我們小朋友就喝水。媽愛光顧「李香蘭」,每次都是買玫瑰紅茶。很喜歡跟她去茶莊,走進去,充滿著茶葉芳香,很怡神。

「裝住啲茶葉要黎煲,煲滾左就可以沖奶茶飲嘞。」

「沖奶茶?係唔係好似樓下樹記果啲奶茶咁呀?」

「係嘞。」

偶爾的星期天,爸媽會帶我們去「樹記」冰室吃早餐,我每次喝的都是鮮奶,有時媽會逼我喝「谷咕」。哼,「谷咕」還可以,但是「阿華田」和「好立克」就一定誓不低頭。

哥哥比較飄忽,並非每次都一樣,但是似乎喝得最多的還是「阿華田」。

而姐姐呢,咿,竟然喜歡喝甚麼杏仁霜!我最怕那種味道,喝了總有想倒胃的感覺,她在家都是喝這個的。總覺得這甚麼杏仁霜是成人、甚至是老人家才會喝的;不過姐姐也真的像是大人,她愛勸我多喝杏仁霜,說皮膚也會滑嫩些,我才不管呢。

爸媽都愛喝咖啡,媽有時候也會喝奶茶。奶茶、咖啡從來都是他們成年人喝的;雖然顏色差不多,我都能夠分辨到哪是咖啡、哪是奶茶,只是從未真正嚐試過。

「咁犀利?咁幾時煲呀?我想睇吓點煲呀!」

「一陣間等我洗乾淨個袋就可以煲架喇。」

「好嘢好嘢!......媽,我可唔可以試吓呀,一陣間?」戰戰兢兢的望著媽媽。

「試吓煲?」

「唔係呀,......我想......試吓......飲呀,得唔......得呀?」心裡其實有點慌,不敢再正視媽媽,因為媽媽連眼睛都會罵人的。

「你好想試呀,好啦,畀你飲少少喇。」

嘩,媽媽今天心情一定很好了,那麼寬鬆!

洗乾淨了袋子後,媽就拿出一罐茶葉。

「點解未見過呢罐茶葉嘅,乜唔係用果罐咩?」一直只懂得那罐玫瑰紅茶。

「果罐係中國茶葉,沖奶茶要用鬼佬茶葉架。……嗱,呢罐係車仔紅茶。」

媽勺了數茶匙的茶葉倒進布袋裡,把袋口索緊並將棉帶子打了一個結,就放在已盛了水的小茶壺內,再放在爐子上燒煮了。不一會兒水滾了,從茶壺倒出來的就是深褐色的紅茶,一共盛了三杯。然後媽從冰箱把煉奶拿出來,每杯大概加了兩茶匙。跟著我就急不及待地用匙羹放在杯內搖攪著,看著那茶由深褐色慢慢變成「奶茶」色(=P)。

「嘩!……」按捺不住一份莫名的興奮;第一,我喜歡看著一些東西變化的過程,第二,媽媽准許我喝奶茶,這將會是我的第一杯奶茶,(雖然知道媽只會讓我喝少許。)那年我大概是五歲吧。


我沒有第一時間去品嚐,因為我素來都怕熱,包括怕吃太熱(剛煮好)的食物。所以我就只好乖乖的坐下來,等。

媽媽還是喝咖啡。她取出了那瓶「雀巢金蓋」粗粒咖啡粉,弄了一杯香濃咖啡,當然是由我去負責把咖啡攪勻了。除了是因為我喜歡看著它變色之外,我也很喜歡嗅那咖啡味,很香很香的。但是我不喜歡喝,因為媽曾經讓我試過一口,唔,味道不太好,但也不算是太難喝,只是最不喜歡的就是吞下之後,口腔好像還留有一點酸澀味道。

姐姐和哥哥也坐到飯桌前,吃著餅乾,他們也可以喝奶茶。這就是我們那個週末的下午茶了。

哈,好了,差不多了。我用手指稍稍觸摸杯子,覺得可以喝了,於是就立即拿起杯子,慢慢的喝了一口。

「好好飲呀!」再喝一口,「真係好好飲呀!」我大聲的跟媽媽說,媽只管笑。

「點好飲法呀?」哥哥問我。

「總之好好味喇!」也不顧得答他,餅乾也不吃了,又再喝一口。

「喂,媽話你只可以飲少少咋喎,你飲咁多?……媽 ,你睇吓阿妹!」

「咁你哋又飲?」實在心有不甘。

「點同呀,我哋大過你呀。」哼,好像是很有道理般!

「媽,我想飲多啲,得唔得呀?」不知哪來的膽量,就是望著媽媽問。

「好喇,唔好嘈嘞,俾你飲大半杯喇。」

「好嘢!」簡直是興奮莫名,名正言順的繼續喝了。

「喂,夠嘞喎,夠大半杯喇。」哥哥就是看準我,大聲嚷著。

向來知道媽媽說一不二,我也知道有節制,就放下杯子。眼睛卻睜著哥哥那副得意模樣,我的眼睛也懂罵人的!

「你死喇,你飲咁多,今晚實瞓唔著呀。」哥哥突然說。也讓我想起爸爸說過,很多人喝了咖啡會睡不著,怎麼奶茶也會讓人睡不著?!。。。。。。

142 comments:

程音語 said...

嘿嘿,竟然插到...

有無人幾得幾十年前睇教育電視,有一集係講乘數時A X B X C = A X C X B,次序調亂係唔會改變個結果既。節目入面用既比喻就係沖奶茶,先落茶再落奶再落糖,同先落糖再落奶再落茶,沖出黎都係叫做奶茶。

但,其實係咪落茶先沖出黎好味D呢? 定係心理作用黎架?

程音語 said...

噢,應該係"記得",唔係"幾得"....

The Inner Space said...

咁 小朱姐你每天早餐吃完排飽後﹐都是沖玫瑰花奶茶?

坊間用的是絲幭奶茶﹐令壽堂用小布包﹐頗有異曲同工之效。

用川寧紅茶好﹐還是百爵 EARL GREY 黑茶好飲些?

你喜歡星馬流行的「拉茶」冇?

The Inner Space said...



令友人上面所說的﹐茶奶糖先後次序﹐聽聞是有學問的﹐視乎奶的溫度﹐和用甚麼糖。

小朱姐是飲奶茶大行家﹐可否再寫多一篇何如「沖奶茶」?

新鮮人 said...

哈哈哈~~~
不知你大個咗同兄長的關係是否一樣有趣呢? :p

暗黑的卡夫卡 said...

奶茶豬 is a good nick name for you... =P

The Inner Space said...

啊!小朱姐:


忘了問你幅相片是網上借來的﹐
還是你每天早餐奶茶你的私伙寫真?

C.M. said...

哦... 原來小珠也曾是谷咕一族既...

你媽媽,好叻啊!

南區肥龍 said...

「除了是因為我喜歡看著它變色之外,我也很喜歡嗅那咖啡味,很香很香的。」

我都好鍾意聞啱啱沖好既奶茶同咖啡味. 第一口更妙不可言!

Old Cake said...

個故事好warm.
小豬小時好幸福...I am jealous! hehe

米都話唔搞咯 said...

啊!澳門有間叫生利o既茶餐廳,d奶茶真係好好飲。最特別o既係,o的茶係搵一個鐵壺仔裝住俾你,再俾你一個小茶隔,到飲o既時侯你自己再加奶同糖...

下次一齊去澳門飲丫!

註:生利位置是在瑪嘉烈蛋撻店附近,很易搵的。

aulina said...

小朱我又同你一樣喇!一樣「貓舌」,太熱的吃不下要待涼呀,哈哈哈!

程音語& space:我部得果課ETV!!!因為佢講錯!

茶糖奶落法:

1. 茶
2. 糖
3. 奶

原因:糖先下再沖茶的話糖有可能黏在一起而較難溶化。下茶以後馬上下奶的話溫度低了糖也難容。所以上面的程序最乖乖,讓三者混合。

人大了,不太喜歡港式奶茶,奶和茶都太濃,不下糖不行,所以較喜歡自己沖較淡的版本,不下糖。

said...

我不喝奶茶的,除了妈妈亲手泡的

xiao zhu said...

陰雨& Space:

哈哈,陰雨,黎我呢度唔駛插架!

Space,我雖然係飲左奶茶好多年,但係我從來都冇乜研究架、好求其架。至於次序先後嘅問題,我知道係有啲講法嘅。

Aulina 話落糖先有可能黏在一起而較難溶化。hmm,其實問題唔太大,因為始終攪多幾下都會溶。

其實首先係要睇茶(水)嘅溫度,最好唔好呢頭滾左,跟住沖,然後果頭即刻落糖,因為水熱得滯即刻落糖,會將糖裡面嘅Hydrogen 離子釋出變酸(當然唔會酸到你好覺果隻),講究嘅人就唔會咁囉。(嗱,我唔係讀理科架,唔好同我斟酌咁多呀!)

第二點解唔落奶先過落糖,呢個係假設左啲奶係雪凍左嘅,咁樣會將茶溫降低,影響糖嘅溶化。不過如果啲奶係暖嘅,就冇呢個問題嘞。

白沙糖會溶得快啲。雖然知道白糖冇咁健康,但係如果講味道,我會覺得奶茶落白糖好味過落咖啡黃糖。

綜合黎講,Aulina 講嘅茶、糖、奶嘅次序係好似係好啲嘅。

而我如果喺出邊餐廳飲奶茶,(唔係茶餐廳呀吓。)我通常會倒左啲茶喺杯之後,會先用個匙羹攪幾吓先,散吓熱,跟住落糖,攪勻,再最後落奶。

但係講左咁多,有冇人留意我喺篇文度其實係冇提到落糖固喎。知唔知點解呀?(咁問梗係唔係唔記得講喇!)^_

xiao zhu said...

Space:

你冇聽到我阿媽講咩,玫瑰紅茶係中國茶黎架。

川寧都OK,最憎飲Earl Grey,基本上果啲加左其他嘢嘅茶我都唔鍾意,例如啲有生果味嘅,唔!

幅相係網上借架,你冇留意到個碟咩,係茶餐廳常見果啲啡色杯碟嘅碟黎架。你又要我講多一次嘞,我都話我係電腦白痴咯,我又唔影相,又唔識點將啲相整上黎架。=P

xiao zhu said...

新鮮:

我阿哥雖然大我幾多,但係細個嘅時候我哋都成日玩、又成日打交架。不過大個左佢個人越黎越變得靜,我都係,所以相處唔同左。但係大家當然仍然互相關心喇。我同佢都有好多回憶架。

xiao zhu said...

K:

好呀,我已經好多花名,多個唔多。而且我都鍾意奶茶豬呢個名,好cute!^^

xiao zhu said...

C.M.:

你都飲谷咕嘅咩?

xiao zhu said...

肥龍:

所以鍾意同媽媽一齊飲嘢,佢一定飲咖啡,而我又一定飲奶茶,所以味覺同嗅覺都可以同時享受到。^_

The Inner Space said...

「鷹嘜」煉奶﹐「壽星公」煉奶﹐
真是很久無用來沖茶了﹐
咁你E+都是用中國玫瑰紅茶呀?
即係唔係無玫瑰花香的茶!

xiao zhu said...

老餅:

你好似唔係第一次話。。。umm

:P

xiao zhu said...

米搞:

我好耐好耐冇去過澳門嚕。你都鍾意飲奶茶架? ^_^

xiao zhu said...

Aulie:

「貓舌」? 乜唔食得熱嘢係咁形容架?我而家至知咋,未聽過呀。

我都係比較鍾意飲港式奶茶,不過如果奶茶唔落糖,我覺得唔能夠將果地味道調到出黎,硬係爭啲。但係我都唔會落好多糖,通常如果係一包包果啲,我都唔會落晒成包嘅。

xiao zhu said...

杉:

那你媽媽泡的茶一定是很美味的了!~~

xiao zhu said...

Space:

阿媽係買「鷹嘜」煉奶架。

我平時喺屋企係飲水(細個習慣到而家都冇改),唔飲中國茶架。出外食飯就會飲茶。

shek said...

描述如此詳細,你對兒時片段的回憶定必非常深刻。
我也很喜歡喝茶,特別是中國綠茶,泡了一杯茶,茶的清香可使我精神一振,而當經過賣茶葉的店子時,從店內傳出的茶葉香氣也每每使我陶醉!
港式奶茶我也非常喜愛,每當有機會到茶餐廳用饍,總按捺不住點一杯「茶走」(即奶茶走淡奶及糖,改用煉奶),愛它的香滑,及煉奶在茶中的甜味。
曾在尖沙咀山林道一間很細小的日本食肆,點一客套餐可配一杯冷或熱的飲品,熱飲可選奶茶,那杯奶茶正是我喜愛的「茶走」,而且紅茶與煉奶份量的配合非常恰到好處;那食肆的食物質素雖然普通,但奉送的奶茶卻是神來之筆,如此喧賓奪主,也確出乎我意料之外!

易亦 said...

咦!竟然有人提茶走喎!

我通常中意飲水
再唔係好立克
再唔係就茶走

呵呵終於有野係程爺唔識架喇
飲奶茶聽講係先糖後奶
不過我都好似小豬咁覺得搞多兩下咪溶囉
但係落糖都係麻煩
茶走就最好喇又滑又有味

樂遊 said...

有點像我第一次飲啤酒的情形。
小時候就很愛咖啡啦,常吼老娘不在時自己沖.......試過被發現....打完....繼續。哈哈哈!

The Inner Space said...

quoting

小朱姐: 最憎飲Earl Grey


係呀! 百爵茶EARL GREY
幾蝦人架﹐唔鐘意既人
話似漱口水架!

aulie said...

今朝先去kfc要咗杯奶茶,唉,糖又係唔容...

貓舌好似係日文,d識日文同學仔成日笑我係貓舌。

xiao zhu said...

Shek:

我竟然唔識咩叫「茶走」添,真係「焙」!原來係咁解。

係喇,呢個就係點解我篇文冇提過加糖嘅原因,煉奶本身夠甜,唔需要再加糖。同埋買煉奶一來平過「三花淡奶」,又可以搽麵包食,又可以沖奶水飲。(不過我好唔鍾意飲架。)

你講山林道果間日本食肆而家仲有冇呀,得閒都去試吓先。 ^^

xiao zhu said...

易亦:

我真係未試過喺出面茶餐廳飲「煉奶」沖嘅奶茶喎。通常佢哋畀啲份量會唔會甜得滯架? 駛唔駛講明落幾多架?

xiao zhu said...

樂遊:

「...被發現....打完....繼續。」睇過你寫過關於你細個嘅嘢,我都可以想像到呀!:D

你講起第一次飲啤酒,又令我諗起細個第一次飲酒,係飲威士忌。哈哈,諗起都好笑!得閒又寫吓先,喂,你都寫吓你第一點飲啤酒吖。

xiao zhu said...

Space:

聽你嘅語氣,你鍾意飲Earl Grey 架?

我真係唔識欣賞嘞,都唔知點形容啲味呀!

xiao zhu said...

Aulie:

咁我估KFC啲茶可能沖左擺耐左,攤凍左囉,咁啲糖咪難溶囉。

我細個食飯好慢架,成日話啲飯餸熱,阿媽就成日都鬧我,問我係唔係個飯碗下面有個火爐喎。差唔多餐餐飯都搞到佢好勞氣架,哈哈!

The Inner Space said...

係呀!

英式百爵茶 EARL GREY﹐是黑茶﹐就咁清飲﹐加蜜糖﹐做檸檬茶﹐英式奶茶配SCONE飽﹐三文治等等的 ENGLISH HIGH TEA 正!

都唔知點形容啲味呀!
唔鐘意既人話似漱口水架!

vicky said...

I drink 雀巢金蓋 every morning.

xiao zhu said...

Space:

我好鍾意食scone架,不過淨係鍾意食plain 嘅,唔鍾意有提子或者其他嘢嘅。

xiao zhu said...

Vicky:

雀巢金蓋,我阿媽飲左幾十年嘞。佢仲好鍾意食咖啡蛋糕同咖啡糖添呀。^_

不敗的魔術師 said...

咁丁志明果次你食得咁快,真係難為左八歲既小豬喇.

xiao zhu said...

魔術師:

如果做自己想做或者鍾意做嘅嘢,係唔會覺得難為嘅,呢啲係人之常情黎嘅啫。

多謝你仲咁掛住丁志明呀。

小貝 said...

很喜歡你寫的這篇,
不過奶茶不能多喝,
奶+茶跟水+火的道理一樣
不融

C.M. said...

記得谷咕係廿年前左右絕跡 lu... 當年我地每次去探嫲嫲時,佢成日都會沖比我地。

xiao zhu said...

小貝:

據我所知,奶和茶都是屬於鹼性嘅食物,為甚麼會有衝突呢?願聞其詳。

反而茶本身其實含咖啡因,應該不宜喝得太多。

xiao zhu said...

C.M.:

谷咕係廿年前左右絕跡? 唔係呀,而家仲有固喎!(雖然係少見好多。)

shek said...

那所店名「味一番」的食肆,於山林道有兩間店子,一大一小。大的較新及整潔,小的較侷促,卻有點親切感,我也只曾於小店光顧午膳。大小二店相隔只有數舖位之遙,中間還隔著一所教堂呢。
上週末午間,在室外氣温高達攝氏35.5度之下,仍抵受不住「茶走」的誘惑,徒步經柯士甸道前往小店光顧。途中早已揮汗如雨,到達後才驚見店已關門,失望之餘,唯有光顧大店。後從大店職員口中得知,小店已改於只在晚上營業,而「茶走」也只於小店供應......我那無奈的心情,可以想見!
你的工作地點在山林道附近嗎?

c said...

谷咕係乜東東黎架?

聽我媽媽講,婆婆最叻整絲襪奶茶的~但未有機會品嘗。

C.M. said...

小珠:

>>谷咕係乜東東黎架?

你睇下!無番咁上下年紀都唔知咩係谷咕呀(咁你...)

xiao zhu said...

Shek:

那麼那間小店在晚間應該還有茶走供應吧。

我的工作地點並非在山林道附近,只是那裡也有很多我兒時的回憶,因為小時候,有一個姨母是住在那兒,而我經常到她的家裡,跟表哥、表妹玩的。

xiao zhu said...

C:

谷咕是Cocoa,我見很多茶餐廳都仍然有供應的,印象中超級市場都似乎仍有售賣的。其實就是朱古力飲品,印象中一直都是不及同類飲品普及,例如阿華田、美陸等。

xiao zhu said...

C.M.:

嘿嘿,你睇你,一場黎到,明明你自己知道都唔答阿C,扮無知呀!你上面都講左你夠有飲咯,哼,當然,你仍然可以話你講嘅「當年」都只不過係幾年前都得嘅。:P

南區肥龍 said...

嘩!行開半日點解變咗51個留言既? 燒豬呢度真係人氣!

「煉奶」沖嘅奶茶又真係好正!

xiao zhu said...

肥龍:

「煉奶」沖嘅奶茶,你都啱? ~_~

南區肥龍 said...

燒豬,

啱, 但怕肥. 或有時想飲就會啦...

shek said...

我已詢問過大店的職員,小店晚市仍有奶茶供應。

xiao zhu said...

肥龍:

又唔係落好多,唔會咁易肥嘅。真係好味啲、香啲架。 ^_

xiao zhu said...

Shek:

嗯,咁有機會我都會去試吓。

你都咁夜嘅? :P

惡女 said...

乜又咁多人架,成日都排到五十幾:p

我呢,講到奶茶就多野講囉,本小姐真係非常非常非常咁愛飲奶茶,但每次飲完都必定會極後悔,因為通常我喺飲完一個小時內,就會出現作嘔、手震、頭暈o既跡象,仲會成晚瞓唔著,所以我只會見同事飲時偷偷飲一啖,或者攞嚟聞吓。

有時放大假,先敢飲一杯。

好慘架。

xiao zhu said...

傻惡女:

如果你飲親奶茶都係咁就真係唔好飲喇,連放假都唔好嗱。你可能係對茶裡面嘅一啲成分,例如茶鹼、咖啡因,係特別敏感,呢啲係會影響你心臟架,忍口喇,頂籠真係放大假時飲一啖咁多好嗱,知唔知呀!

話時話咁你飲唔飲咖啡架,如果飲有冇呢啲類似嘅症狀呀?

seikomatic said...

Earl Grey 只可以淡唔可以濃,用埋純白瓷杯淡淡佛手柑味。俺中意當中國茶齋飲或加檸檬,奶就唔好啦。糖就無論啡茶都唔落。

【葉子媚健身】呢味野好耐無飲啦,以為只系老餅先識佢。細個俺媽話無錢買奶粉,就搵【葉子媚】溝粥水,由細飲到大。

Karen (Sze) said...

哈哈, 我在這裡遇到知音人啦! :p

我呢, 返工的日子一定要有杯奶茶至得(簡直係我的"毒品"), 否則就好似無厘精神咁(上癮添)!

我鍾意煉奶沖茶, 但只會放假時才會咁沖; 平日都係淡奶加兩包糖沖茶。

至於茶, 茶香和口感很重要。個人推薦M&S的錫蘭紅茶或者英國川寧牌的Breadfast tea, 若然要經濟少少, 佳之選會是很好的選擇。

若然要懶d但又要有番奶茶口感, 舊街場的白奶茶可以值得一試。

xiao zhu said...

大師:

你講得冇錯,Earl Grey 嘅味係唔適宜加奶,齋喝我反而仲可以接受。

【葉子媚健身】? 係唔係講緊「谷咕」呀? 未聽過喎。

惡女 said...

飯咖啡又無野架喎,只會好精神,我都懷疑係奶茶茶膽作怪,尤其飲茶餐廳o個o的,就最容易出事。

P.S.:嘿,我會努力爭取留言排名!睇住黎!

xiao zhu said...

Karen:

我有一個朋友朝早一冇奶茶飲,簡直好似毒癮發作好辛苦咁。不過你唔好以為我五歲開始飲奶茶,而且仲好專一咁,我冇上癮固噃。雖然我都有日日飲嘅習慣,但係我隨時唔飲都得,完全唔會覺得唔舒服、囉囉孿咁嘅。

仲有,我其實每次飲呢,都最多飲半杯至大半杯,因為的確唔適宜飲太多。呀,仲有一樣要提醒吓啲姊妹添呀。而家都市女性有一個毛病都幾普遍會發生,就係「乳腺增生」,如果有,就要避免攝取咖啡因嘞,因為會刺激架。「乳腺增生」會有機會病變,發展成乳癌架,所以要小心!

我都鍾意M&S的錫蘭紅茶,但係白奶茶就未試過喎。

xiao zhu said...

Karen:

唔記得講,你落兩包糖好似多左啲喎,減少啲好啲架。我落大半包咋。

xiao zhu said...

惡女:

傻婆,爭乜鬼嘢排名唧,有得分咩!我又唔係CK、渣咕咁人氣,呢度唔駛插架。不過真係好多謝你呀,咁忙都黎。

The Inner Space said...

Snapple now got ICEd Earl Grey Black Tea

Commercial Ads on Youtube

xiao zhu said...

啊,有人提我話【葉子媚健身】係指「煉奶」喎。係喎,醒唔起添。唔該晒呀。

不敗的魔術師 said...

五歲的小豬:

魔術師哥哥都係自細飲奶茶飲大的呢!我都寫左一篇丫.

米都話唔搞咯 said...

我開始估到喇!奶茶豬應該係醫生o黎!識得咁多醫學常識。

xiao zhu said...

魔術師:

我估你會寫架!^_*

吓,有一樣爭啲唔記得,我細個仲鍾意叫阿媽沖多啲奶茶,流番啲倒落汽水樽度,攤凍左再擺落雪櫃度雪凍,做凍奶茶。嘩,簡直冇得彈呀!你有冇試過呀?

xiao zhu said...

米搞:

奶茶豬梗係唔係醫生啦。

不過喺醫學上黎講,有啲醫生識嘅,我都識,有啲醫生唔識嘅,我又識。間中都會有啲醫生搵我問意見架。記住呀,前面幾句嘅重點係「有啲」,如果唔講明驚俾啲專業人士聲討。

Karen (Sze) said...

謝謝提醒!

>>「乳腺增生」會有機會病變,發展成乳癌架。

我都知道呢件事, 所以要定期check住個breast---不論你有無攝取咖啡因, 因為乳癌呢個病, 成因可以很多。

xiao zhu said...

Karen:

你講得啱呀,而家好多病都日趨年輕化,所以唔理咩年齡嘅女性,發育期後,都要學習定期自我檢查乳房。

癌症嘅誘因有好多,有遺傳基因問題(家族有人有過嘅,風險都高好多),生活與飲食習慣,同埋城市人最常見嘅所謂壓力問題。就算生活習慣良好,仍然會有病,因為好多病都可以係stress related 嘅,有冇諗過脂肪肝呀、糖尿病呀呢啲,原來都可以因為壓力而有架?

所以大家真係要保重身心!

shek said...

你是否註冊營養師?

xiao zhu said...

Shek:

哈,唔係呀。:P

樂透翠斯 said...

小豬,

話, 又76個COMMENT啦! 真系人緣好啊!

我都幾鐘意飲奶茶, D人話咖啡系燥, 奶茶系涼, 咁我燥底, 所以通常都飲奶茶, 費時爆蒼!

深刻既港式奶茶系 "太興" - "冰滇原味奶茶" 好香好滑, 而其次系 "英式奶茶" !

xiao zhu said...

Tracy:

咦,係咩,奶茶屬於涼嘅咩? 照計紅茶唔屬於涼固喎。Anyway,鍾意飲、有得飲、飲左又冇事就得喇。^^

不敗的魔術師 said...

小珠妹妹:

你令我諗起而家美心下午茶餐既冰鎮奶荼.

The Inner Space said...

煉奶 ~~ 哈哈哈!


呢D廣東東話揭後語真底死!

xiao zhu said...

魔術師:

係咩,美心有冰鎮奶茶? 最衰我公司附近冇美心喇,咪走去試吓。我而家間中都有擺啲奶茶喺雪櫃做凍奶茶架,覺得好飲過加冰整嘅凍奶茶。

shek said...

美心的冰鎮奶茶我也曾品嚐,味道挺不錯,冰在茶外,沒有影響奶茶幼滑的口感。
個人還是認為奶茶熱飲,味道更佳!

The Inner Space said...

連有些醫生都請教你﹐
小朱姐是「顧問醫生」???

易亦 said...

係呀惡女
我都侯住d排名呀
奶茶豬醫生呢度咁hit
等我搶第一百個post先

呢度回應數咁高好玩呀!
有挑戰性

不過呢唔知你睇到頭暈
會不會miss左我呢個回應呢?

xiao zhu said...

Shek:

其實我都覺得奶茶係熱嘅好飲啲,不過夏天有時飲番吓啲凍飲會舒服啲,而且,我從來都唔飲汽水果類品嘅,所以凍飲嘅選擇唔多,常飲嘅係凍鮮奶。^_

xiao zhu said...

Space:

「顧問醫生」咪又即係醫生,我都話左我唔係醫生咯。:P

xiao zhu said...

傻亦:

搶第一百個post? 就算俾你搶到都冇獎固喎!咪成日喺度揶揄我喇。

亦豬 said...

傻豬:

咪傻喇
我係度讚緊你咋
我冇乜野係唔會揶揄人既
尤其係溫文有禮既小豬
夠膽係你個地頭揶揄你唔驚犯眾怒咩?

係冇獎架
不過我同惡女係度幫你搞下氣氛之嘛

重有我好中意飲凍鮮奶架
以前係外國d宿舍度冇水飲
餐餐食飯狂飲鮮奶(免費)
本來瘦到條柴咁
結果一年後增左20磅!

米都話唔搞咯 said...

>「顧問醫生」咪又即係醫生,我都話左我唔係醫生咯。

我知我知,係「醫生顧問」!

xiao zhu said...

亦豬個亦:

我知你同惡女都係好熱心嘅人。^^

外國啲鮮奶好飲啲,易肥啲。不過我食乜飲乜都唔肥嘅,真係哂料呀。

易亦 said...

亦豬個豬:

係呀!外國個d奶係好好味道架

從來係香港食野我都唔吸收
返香港咁耐
不論我有幾大食都好
體重從來都唔會加減超過三磅
而且穩定左好多年都係咁
食又唔會肥
唔食又唔瘦咁

xiao zhu said...

米搞:

吓,你真係好聰明喎。嗯,「醫生顧問」都可以係一個職業,不過我嘅職業又唔係呢個,又但係我嘅工作有時都會真係涉及到呢啲性質。

南區肥龍 said...

如果係到醫護健康有關, 不如考慮吓拍番輯「燒豬與你」. 好有可能好似呢度一樣咁人氣呀! ^^

米都話唔搞咯 said...

我知我知,係「利時神婆」!

醫生唔識醫o既病就搵你幫手。

xiao zhu said...

肥龍:

拍番輯「燒豬與你」? 講醫學健康啲嘢? 擺邊度播呀? 唔係專業醫生講,冇公信力架,揾鬼睇嚕!^_

易亦 said...

車有幾難遮
自己放係youtube
然後再link黎blog度
咁樣咪得囉
係外國呢d咁既節目分分鐘鐘hit過電視收視呀

我支持「燒豬與你」!

xiao zhu said...

米搞:

你都真係幾搞嘢固喎。神婆我都知,但係咩係「利時神婆」呀? 係唔係都係神婆咁解呀? 撇開中唔中,從你嘅思路黎睇,你都好聰明,同好夠想像力,唔怪得你畫啲畫咁好喇!^^

易亦 said...

利時 好似係一個商場個名
神婆 係咩你知喇

加埋呢就係報章雜誌度有個專欄專解答疑難雜症囉

The Inner Space said...

前有無線之花黃德如學中醫得成正果﹐在有線同港臺談食療醫藥﹐今有小朱姐上網講「健康教育~~小朱與你」!


靚女真係著數D!!!

易亦 said...

插!100! YEAH!

易亦 said...

亦豬個豬:

恭喜晒喎
又破百喇!
:D

南區肥龍 said...

「燒豬與你」全輯係以深入淺出去講燒豬時燒出黎既豬皮既香脆度與食客(即你)既醫學健康節目.

節目由醒目兼優雅兼識寫詩兼識故事兼識整水箱兼懶到出汁兼忟忟憎憎兼充滿醫學健康常識既燒豬女俠主持.

p.s. 101添....

xiao zhu said...

易亦:

咿,講黎講去都係想氹我現身之嘛,我真係唔制呀!

>>利時 好似係一個商場個名

咁同個解釋有咩關係呀?

多謝你咁撐我呀!^_

xiao zhu said...

Space:

唔敢亂咁答你呢個留言,都係問清楚先。你講緊嘅靚女唔係specified 邊個固呵?

xiao zhu said...

肥龍:

嗯,個節目內容都好似幾吸引喎。不過...我諗揾你做主持可能會好睇啲呀,你咁勁、咁有創意,嘩嘩嘩,42個字嘅外號咁長都俾你諗到,小女子真係佩服得五體投地呀。簡直...真係...搞到我好唔好意思呀。閃...

易亦 said...

o下?氹你現身?真係冇唸過喎!

嘿嘿肥龍講既香脆豬皮搞到我口水都流埋

去食野先

米都話唔搞咯 said...

利時神婆

http://www.google.com.hk/search?complete=1&hl=zh-TW&q=%E5%88%A9%E6%99%82%E7%A5%9E%E5%A9%86&btnG=Google+%E6%90%9C%E5%B0%8B&meta=

米都話唔搞咯 said...

>九歲愛上繽紛可愛占卜牌,七年前開設「利時神婆」占卜店,希望為人排難解紛,其後加開「神婆學堂」,教授塔羅占卜術。 曾於<東方日報>、<成報>、<太陽報>等各大報章雜誌撰寫占卜主題文章;接受無線電視<緣來如此>玄學節目訪問,及亞洲電視不同 ...

米都話唔搞咯 said...

「燒豬與你」

我又要睇!

The Inner Space said...

小朱姐:


狹義來說我是說小朱姐和黃德如是靚女
廣義來說我是說靚女比較唔靚女著數D
兩個總括來說是小朱姐靚女較為著數遮

xiao zhu said...

米搞:

Thanks for the link. 我而家知嘞。

要睇「燒豬與你」,咁你要揾肥龍搞掂佢嘞,係佢話拍嘅。

南區肥龍 said...

(導演):燒豬, 埋位唔該!

易亦 said...

亦豬個豬

豬姐
導演叫埋位喇!

Old Cake said...

113 posts? WOW...小朱 is red HOT! hehe It is time to put 「燒豬與你」on youtube la.

南區肥龍 said...

※更正啟示※

(小導演):燒豬姐, 埋位唔該!

xiao zhu said...

肥龍:

合約都未傾妥,埋咩位呀?

xiao zhu said...

易亦:

乜你轉左行做副導、定場務呀? 未呀,你個導演搞錯左喇,條件都未傾好,未有戲開呀,你返屋企等通告喇。

xiao zhu said...

老餅:

食蛋糕喇,燒豬冇益架!

易亦 said...

哈哈
亦豬個亦又點會係人地個副手呢?
係都係亦豬個豬既副手喇!

既然未傾好咁我地返去囉
;)

Old Cake said...

"食蛋糕喇,燒豬冇益架!"<--- 埋位la. No one wants to eat you wor! haha

程音語 said...

咦, 主角扭計話唔拍喎. 阿易監制, 駛唔駛加D片酬呢?

易亦 said...

主角扭計唔拍
你監佢都唔制架喇
勉強冇幸福架

「燒豬與你」呢d健康節目
應該係你情我願既

第一集應該係幫肥龍減肥
嘿嘿

南區肥龍 said...

易亦,

第一集應該係幫肥龍減肥>>

嘿呢個提議唔錯. 你情我願就你情我願啦 (不過燒豬可能怕油膩, 唔願!)

喺拍完第一集之後, 肥龍自然安排去深山(實際係深灣)進行秘密特訓.

咁之後呢肥龍會喺最後一集再走番出黎(當然減咗肥, 留番些少肚腩, 型英帥靚正咁喺後台彈出黎),接受被邀請出席既程音語呀, old cake呀, 米搞呀, 惡女呀, cm呀.... 及各方網友既祝福, 好無呢咁?

又肥龍會喊唒咁講番呢段經歷, 同多謝「燒豬與你」呢個節目同最重要既燒豬, 先可以咁有勇氣去付諸行動.

最後黎個大合唱, 肯定勁到爆灯!^^

南區肥龍 said...

呀, 差啲唔記得仲有不可缺少既金牌監制易亦炮制「燒豬與你」呢個咁有意義既節目...

易亦 said...

呵呵
咁要呀音樂監製老餅幫豬姐路返一首「燒豬始終有你」先得喇!


就黎一個集體創作
大家幫手填詞喇?


金龍玉豬
打響頭炮


呢個製作特輯既收視律已經突破125點喇

(嘿嘿我去到邊都搞到d回覆鬼五馬六
幫亦豬趕走晒d高檔客
佢就黎殺左我架喇)

易亦 said...

哈哈
差d唔記得要搵呀米永成米sir畫返一幅poster添!
勿怪勿怪

xiao zhu said...

Space:

講真,我覺得黃德如完全稱唔上係靚女,只算係普通姿色,五官端正啫。不過當然各花入各眼喇,尤其是男女嘅審美都頗有迴異。

那,黃德如都叫做有各真人去講吓,喂,你都未睇過我,點可以有個咁嘅結論架,你啲妄想症又發作喇。=P

xiao zhu said...

肥龍、易亦、老餅、陰雨:

我行開左幾個鐘啫,乜個世界變成咁嘞。度晒大橋,仲要作曲、出poster添?

肥龍,哦原來係你想出鏡至真,早響吖!我識好多人架,幫你搵隊 production crew 黎,至多計平啲喇。

易亦,喂,咁你而家係我助手定係監製唧。我同你傾傾先好啲喎。

>>幫亦豬趕走晒d高檔客,佢就黎殺左我架喇

易亦,乜你咁講嘢架!我呢度冇客固喎,黎得呢度嘅都係我嘅friend,你當我係咩先?

南區肥龍 said...

燒豬,

出鏡? 要既咩? 點解無人同我講既? 我唔制架....咁可唔可打格仔呀?

^______________^"

Old Cake said...

打格仔? What kind of program that we are talking about here? *_*

xiao zhu said...

肥龍:

>>咁之後呢肥龍會喺最後一集再走番出黎(當然減咗肥, 留番些少肚腩, 型英帥靚正咁喺後台彈出黎),接受被邀請出席既程音語呀, old cake呀, 米搞呀, 惡女呀, cm呀.... 及各方網友既祝福,...

係你自己度嘅橋黎固喎,唔駛出鏡? 點拍呀?

xiao zhu said...

老餅:

定啲黎,你冇去錯blog。:P

南區肥龍 said...

淨係對"龍眼"打格仔囉! ^^

The Inner Space said...

Quoting:


講真,我覺得黃德如完全稱唔上係靚女,只算係普通姿色,五官端正啫。不過當然各花入各眼喇,尤其是男女嘅審美都頗有迴異。

那,黃德如都叫做有各真人去講吓,喂,你都未睇過我,點可以有個咁嘅結論架,你啲妄想症又發作喇。=P


又再 Quoting: 的士奇遇(二)

「我記得喇,應該好似係兩年幾前。」(嘩,你都好誇張啫!我坐的士點都少過你載客喇,我都唔認得你,你竟然認得我?你點作埋落去呀?)

「你咁都記得?」仍然很鎮定地問他。(睇吓你點答。)

「我認得你把聲先嘅。你上次都係去盈翠,又係咁講法吖嘛。」(唓,講嘢呀,咁多人去盈翠,我唔信你兩年來淨係載過我一個客去嗰度。而且唔係咁講咁點講呀,廢話。)

他又說:「我仲問你係唔係喺電台做嘅添,你話唔係。」(咦,又好似有啲印象喎!)

他繼續說:「係半夜三點幾,你一個女仔喺斧山道上車嘅,係嘞,我記得嘞。係你嘞,而家再睇番你個樣,我肯定呀!」他邊說,邊昂起頭從倒後鏡看著我。「你記唔記得呀,你話咗唔係做電台嘅,我跟住問你係唔係拍戲嘅。你又話唔係。」

呀,我也想起來了。對呀,他說得對呀,那個半夜,我真的曾經在釜山道乘的士回家。是真的!

可是,他怎麼會記得?還記得那麼清楚!兩年多前,他能記得那麼清楚!莫非他有過人的記憶力?想到這兒,本來有的憂慮比較放鬆了,反而很好奇。

「點解你咁好記性嘅?連講過啲嘢都記得哂。」

「唔知喎,我平時唔係話特別好記性個喎,不過就真係好記得載過你囉。」

「係咩?」

「可能你把聲又好聽,你又靚女喇。」(死,今次衰多口添。)


你自己真係咁寫有文為證架!

Old Cake said...

Space係得既! ^_*

xiao zhu said...

Space:

你都冇親眼見過,人講吓你就信架嗱? 而且呀,就算我哋平日去街市買菜,都可能會問個阿嬸:"靚女,啲通菜幾錢斤呀?" 咁喇。

xiao zhu said...

老餅:

你淨係掛住食餅,食完呢款食果款,人地講你又話係,你有冇睇清楚架? 件餅呀!哈哈。

易亦 said...

嘿嘿
當然又係助手又係監製喇
咁容易d控制呀嘛
絕對唔會出現d你唔想出現既狀況
你話係咪?

唉呀
中國人有句說話:過門都係客呀嘛
你呢處不lau好多人黎
而且個個都談吐得體
同我呢d大癲大沸既講野方式唔同
怕嚇親你d朋友呀

Old Cake said...

咁你可以post你D相, prove 個揸的士朋友 wrong架?

新鮮人 said...

打交??
佢大你咁多,
你真的唔怕死喎,
牛王妹呀~~~~
嘻嘻! :p

xiao zhu said...

老餅:

嘿,我真係唔上當呀。好吖,咁我就認左佢喇,係呀,我仲靚到 "dum" 一聲添呀。(哈哈,"dum" 心口個"dum" 呀!) :P

xiao zhu said...

新鮮:

係呀,我冇有識死架!咁我恃住佢點都會讓吓我少少架嘛。但係呢,有時佢都唔讓架,咁我咪喊囉,絕招!嘻嘻!^O^