14/05/2008 紀要

有啲嘢，真係要睇環境、睇心情、mood 到至講到。琴晚到今朝，都係講左好少咋，不過都已經好好喇，起碼叫做開左個頭。所以好開心！

今朝好早返屋企。

* * * * * * * * * *

同一個人，喺一日之內俾我勁鬧兩次，第二次仲係喺一個公眾場所（雖然當時周圍都好少好少人）；佢真係極品、又真係好有福氣；幾多人想見我發惡都唔知幾困難。（一定有人會會心微笑。）

幾用心良苦！要冇晒儀態咁，犧牲幾大呀。係，係計算左嘅，係計算左先至做嘅，仲要一路做、一路都喺度評估、檢討、調校。（啱唔啱拍恐怖片呢？）雖然慣左做醜人，又唔介意做，不過好似今次去得咁盡，都值得寫低佢。

* * * * * * * * * *

一早鬧完人之後（第一次），跟住又要準備下晝一場談判。做做吓嘢，嗯，都係唔得，突然好想有個人了解吓呢一刻嘅我，（了解咩呢？！嘿，竟然會咁諗嘅，少有！）於是就揾左一個正在好煩嘅人傾左個幾鐘。（好，就叫佢做阿煩喇，暫時。）（傾咁耐，乜唔駛做架咩，兩個都？）

傾完覺得好開心；梗係喇，唔係都唔會揾佢傾喇。又梗係喇，吞扑吞左個幾鐘，點會唔過癮呀。阿煩成日都激我架，（其實係隔好耐至會傾一次。）不過佢又好好固喎，好多時都會讓我嘅。發覺有時同佢耍吓無賴，係特別開心架，不過我唔會濫用嘅，因為耍無賴唔係我嘅強項；（雖然我喺我個牌頭上面認左，其實應該係一個目標黎嘅，仲係學緊點樣無賴完一啲都唔會覺得唔好意思咁至得。）再者，既然有咁好，我會留番間中有需要嘅時候先至做，費事做得多會冇效。

最近幾次同阿煩傾偈，有一種越來越舒暢嘅感覺，好一廂情願地覺得，我哋嘅溝通係有提昇左。不過又都好唔開心，因為見佢唔開心。好想可以幫到佢。

* * * * * * * * * *

本來預左係一場多數都係運吉嘅談判，竟然出人意表，一開波就即刻俾人搞吋個 party。因為預左頂籠係運吉，唔係想一面倒爛尾，所以即刻做番啲嘢，（跟住有人就俾我勁鬧第二次嘞。）令到已經準備好嘅菜可以上到檯，跟住另外又有人做好做醜，結果都算做有啲進展，唔駛齋運吉。跟住劇情嘅發展，又要睇吓我點寫落去喇。

* * * * * * * * * *

返到公司好想即刻又揾阿煩。呢啲係唔係叫做食過番尋味呢？係，女人，真係唔縱得架！會得寸進尺架。

結果梗係冇揾喇，我都仲係好善解人意嘅。

* * * * * * * * * *

瞓喺梳化度瞌著左。有個SMS，阿煩好似揾到啲嘢，不過又係巡例講啲唔講啲，真係乞人憎。