換燈泡的男人

「喂。」

「啱啱返呀？」

「食埋飯喇。」

「喂，Vincy有冇call你呀？」

「佢返咗黎咩？冇喎。佢唔會揾我嘅，係都經你喇。」

「係呀，佢call我話想去我office探我，一齊食lunch喎。」

「咁幾時呀？」

「唉，我邊得閒招呼佢啫。我同佢講老細唔係度，我唔出得去lunch呀。咁佢話都上黎坐一陣喎。激死呀！」

「咁咪見吓佢囉，反正你真係咁忙，佢都唔會坐得好耐喇。」

「唉，學你話齋，此情不再吖嘛。」

「吓，佢次次返黎都有揾你，佢仲好有你心吖。話哂當年我哋四個人都係你識佢最耐。」

「呻吓啫，我都會見佢。你做緊咩呀？」

「嘿，講出黎都醜呀，呢個禮拜前後燒咗三個燈膽，我都冇換。頭先食食吓飯，又燒多一個，想唔換都唔得喇，如果唔係要玩洒盲雞架喇。」

「咁換咗未？」

「換咗三個咋。」

「點解呀？」

「唏，以前咪講過囉，又問。」

「哦，又係個死位呀？」

「係囉，周圍冇嘢扶，又要企到最高果級，我唔得架嘛！」

「哈，有時睇見你都幾好笑，乜機物機都自己搞，換個燈膽就難到你。」

「咩呀，而家唔係個燈膽難到我喎，其他果啲我咪換咗囉，不過果個位咁樣，我畏高之嘛。好出奇咩，好多人都畏高架喇。」

「但係好多畏高嘅人都冇你咁勁呢，文武雙全，淨係畏高，哈哈。」

「你而家算係歧視囉噃！」

「唉，唔敢。咁點呀你，駛唔駛我叫肥佬禮拜過黎同你換呀？」

「傻嘅，梗係唔駛喇，換燈膽果個人聽日會喺度，咪聽日先囉，而家係爭一個之嘛，夠光呀。」

「哦，咁就得喇。點呀？」

「咩呀？」

「咩呀，有冇多番啲工種呀？」

「都講咗喇。以前都有兼埋secu，冇喇，而家淨係換燈膽咋。」

「真係加唔番呀？」

「你知我喇。」

「嗯，我要睇得得哋喇。拜拜。」

「Bye。」