萬物有時

「喂，我叫阿Tim呀。你今日精神好番好多咯喎。」

「.....係呀。我叫Alex。」有點窘。

「你點飲到咁多架？聽啲人講又洗頭水、又梘液，後生仔，駛唔駛呀。」

「......」

「咩咁大不了吖，女之嘛，睇你咪廿歲出頭，仲係老豆老母供緊你讀書嗰隻架喇。咁遠水路飛得過嚟，屋企都唔慌差得去邊喇下話，唔好咁哂料喎，細路！」

「......」Alex苦笑一下。

Tim拿起一個蘋果，拋給Alex。

「食喇。」

「多謝。」

「唉，啱架，食幾多、著幾多真係整定架。」

Tim咬了一口蘋果。

「你睇，邊有人好似我咁運滯至得架？衰到連閻羅王都唔X收貨。唔收貨都唔緊要嘞，XXXX，都唔好咁樣玩我吖嘛！」

「你...點呀？」

「我都係抵死架喇。賭足半世人，搞到乜X都冇埋，老婆帶埋個仔走路。啱嘅，畀我我都冇鞋挽屐走啦。欠落週身債，屋企都冇得返，車又賣X埋。唔死等獻世咩！」

又咬一口蘋果。

「我衰到要搭三個鐘頭車去個朋友度，呃佢話要去紅番區做嘢，借佢支鎗嚟防吓身。」

Tim把吃了大半的蘋果放下，拿起杯，喝了一口。

「我行行吓，個肚又咕咕聲，坐低喺公園張長凳度，食左件冬甩；個心就諗，喺邊度好呢？諗諗吓就攞支鎗出嚟睇，一路仲喺度諗喺邊度好，吓，X，冇端端隻手唔知做咩突然抽筋咁，跟住就 “嘭”一聲，個頭就覺得好痛，咁就冇咗知覺嘞。」

「支鎗走火打中你個頭呀？」

「係就多謝上帝啦！X，佢都唔睇我。你知唔知我黑成點呀？支鎗就真係走火喇，但係冇打中我個頭，打中我頭頂支街燈，跌落嚟扑中我個頭呀！X！」

房門突然被推開，有一個護士探身進來。Tim即以輕佻的語氣說：
「Know 喇 know 喇，bed time 嘛！」

(如有雷同，實屬巧合。 )


~~~~~~~~~~


記掛著一個朋友。